पोखरा । कास्की जिल्लाको माछापुच्छ्रे गाउँपालिका–२ भुर्जुङखोलामा अवस्थित माछापुच्छ्रे माध्यमिक विद्यालय व्यवस्थापन समितिको अध्यक्ष बमबहादुर गुरुङ चयन भए ।

विद्यालयमा शुक्रबार भएको भेलाले व्यवसायी एवं समाजसेवी गुरुङलाई पुनः अध्यक्षमा चयन गरेको हो । समितिका सदस्यहरू सुमन श्रेष्ठ, माधव आचार्य, सुनिता सेवा, इनबहादुर तामाङ, टेकराज आचार्य, अनील गुरुङ छन् । विद्यालयका प्रधानाध्यापक सन्तोष आचार्य सदस्य सचिव र शिक्षक प्रतिनिधि सुशीला गुरुङ छन् । विद्यालयको संरक्षकमा वडाध्यक्ष गणेश आचार्य रहेका छन् ।

नवगठित व्यवस्थापन समितिका अध्यक्ष गुरुङले विद्यालयलाई जिल्लाकै नमूना बनाउने गरी आफूले काम गर्ने प्रतिबद्धता जनाए । उनी यसअघि विसं २०७७ माघ १४ गते पहिलोपटक विद्यालय व्यवस्थापन समितिको अध्यक्ष चयन भएका थिए । अध्यक्ष गुरुङकै पहलमा विद्यालयलाई भारतीय दूतावासबाट हालै बस प्राप्त भएको थियो ।

‘विद्यालयको शैक्षिक गुणस्तर तथा भौतिक पूर्वाधार विकासमा थप मिहिनेत गरेर काम गर्नेछु । विद्यालयलाई सक्षम र सुविधासम्पन्न बनाउँदै नमूना विद्यालय बनाउने मेरो प्रयास हुनेछ,’ उनले भने ।

वडाध्यक्ष आचार्यले नवगठित विद्यालय व्यवस्थापन समितिका अध्यक्ष गुरुङको दोस्रो कार्यकालमा विद्यालयले शैक्षिक क्षेत्रका थप प्रगति र उत्कृष्टता हासिल गर्ने विश्वास व्यक्त गरे ।