कोरोना भाइरसबाट १२ लाख संक्रमित, ६९ हजार को मृत्यु

Avatar एजेन्सी
चैत्र २४, २०७६

काठमाडौं, २४ चैत । कोरोना भाइरसका कारण सोमबार विहान पौने सातबजेसम्म विभिन्न देशका १२ लाख ७२ हजार मानिस संक्रमित भएका छन्,६९ हजार तीन सय ५० को मृत्यु भएको र दुई लाख ६० हजार उपचारपछि घर फर्किएका छन् ।

इटलीमा दुई हप्तापछि कोभिड–१९ का कारण मृत्यु हुनेको संख्यामा कमी आएको छ । आइतबार इटलीमा ५ सय २५ जनाको मृत्यु भएको छ । इटलीमा कोभिड १९ संक्रमणबाट हालसम्म १५ हजार ८ सय ८७ ले ज्यान गुमाएका छन् । स्पेनमा पछिल्लो २४ घण्टामा ६ सय ७४ जनाको मृत्यु भएको छ । यो स्पेनमा एक हप्तायता २४ घण्टा अवधिमा मृत्यु हुने सबैभन्दा कम संख्या हो । स्पेनमा यो महामारीका कारण अहिलेसम्म १२ हजार ६ सय ४१ जनाको मृत्यु भएको छ, अहिलेसम्म त्यहाँ १ लाख ३१ हजार बढीमा कोरोनाको संक्रमण देखिएको छ ।

अमेरिकामा कोभिड १९ को संक्रमणबाट मृत्यु हुनेको संख्या ९ हजार ५ सय ६२ पुगेको छ । अमेरिकाको न्युयोर्क सिटी कोभिड १९ का कारण सबैभन्दा बढी प्रभावित छ । न्युयोर्कमा मात्र २ हजार २ सय ५६ जनाको मृत्यु भएको छ । अमेरिकामा ३ लाख ३५ हजार मानिसमा यो भाइरसको संक्रमण देखिएको छ ।फ्रान्स ८ हजार मानिसको मृत्यु भइसकेको छ ।पछिल्लो २४ घण्टामा यहाँ मृत्यु हुनेको संख्या ३ सय ५७ पुगेको छ, शनिबार भने यहाँ ४ सय ४१ जनाको मृत्यु भएको थियो । फ्रान्समा अहिलेसम्म ९० हजार भन्दा धेरैमा कोभिड १९ संक्रमण देखिएको छ ।

बेलायतमा पछिल्लो २४ घण्टामा ६ सय २१ जनाको मृत्यु भएको छ । यहाँ मृत्यु हुनेको संख्या ४ हजार ९ सय ३४ पुगेको छ । संक्रमितको संख्या ४८ हजार भन्दा बढी पुगेको छ ।बेलायतका प्रधानमन्त्री बोरिस जोनसोन पनि अस्पताल भर्ना भए भएका छन् ।भारतमा अहिलेसम्म ३ हजार ५ सय ७७ जनामा कोभिड १९ को संक्रमण देखिएको छ भने ८३ जनाको मृत्यु भएको छ । आइतबार मात्र ५ सय ५ नयाँ संक्रमित भेटिएका छन् ।