नवलपुर,२ साउन ।  गण्डकी प्रदेशका मुख्यमन्त्री पृथ्वीसुब्वा गुरुङले नेकपा भित्रकै नेताले आफै पार्टीलाई गाली गर्दै हिड्न गलत भएको बताएका छन् ।

पार्टीभित्र विभिषण प्रवृत्ति बढ्दै गएको छ, उनले भने– जनताले दिएको जनमतलाई कदर गरेर अगाडि बढ्नुका साटो पार्टीकै साथीहरु कांग्रेसलाई गुहार्दै पार्टी विरुद्धै लागिरहेको उनको दावी छ ।

नवलपुरमा सांसद तिलक महतका माता नन्दकली महतको छौठौ पुण्यतिथिको श्रद्धाञ्जलि सभामा बोल्दै मुख्यमन्त्री गुरुङले विभिषण प्रवित्तिको विरुद्ध डटेर सामाना गर्न कार्यकर्तालाई निर्देशन समेत दिए ।

‘माहाभारतमा रावणले आफ्नै परिवारभित्र शत्रु भएर युद्ध हारेको हो, राम बलियो भएर होइन’ उनले भने ‘यस्तो प्रवृत्ति हामीमा देखिएको छ, यस्तो प्रबृत्ति विरुद्ध डटेर लाग्नुस अन्यथा हामी पार्टीलाई जोगाउन सक्दैनौ ।’

पार्टीमा मौलाइरहेको हनुमान प्रवित्तिले समेत पार्टीलाई हानी पु¥याउनेतर्फ सचेत गराए । नेताहरुमा सकरात्मक आलोचना समेत सहन नसक्ने र आफ्नो आलोचना गर्नेवित्तिकै विरोधी खेमाको देख्ने व्यवहारले पार्टीलाई जीवन्त बनाउन नसक्ने उनको भनाई छ ।

पार्टी स्थायी समिति सदस्य तथा गण्डकी प्रदेशका आर्थिक मामिला तथा योजना मन्त्री किरण गुरुङ, पार्टी स्थायी समिति सदस्य सोमनाथ प्यासी, गण्डकी प्रदेश अध्यक्ष हितराज पाण्डे लगायत नेताहरु समेत माननीय महतका आमा नन्दकलीलाई श्रद्धाञ्जलि व्यक्त गर्न नवलपुर पुगेका थिए । स्वर्गीय महतको गत असार २७ गते काठमाडौमा उपचारको क्रममा निधन भएको थियो ।