पोखरा । फुटबलको सर्वोच्च निकाय फिफाको महिला वरीयतामा नेपालले दुई स्थान सुधार गरेको छ । फिफाले शुक्रबार सार्वजनिक गरेको नयाँ वरीयतामा नेपालले दुई स्थान सुधार गरेको हो ।

नयाँ वरीयतामा नेपाल १०१ औं स्थानमा छ । अघिल्लो महिना नेपाल १०३ औं स्थानमा थियो । अघिल्लो महिना नेपालले पाँच स्थान सुधार गरेको थियो । एसियाको वरीयतामा नेपाल २१ औं स्थानमा छ ।

यस्तै, दक्षिण एसियाको वरीयतामा नेपाल दोस्रो स्थानमा छ । नेपाल अघि भारत ५७ औं स्थानमा छ । दक्षिण एसियामा बंगलादेश १३० औं, श्रीलंका १३६ औं, माल्दिभ्स १३९ औं र भुटान १५४ औं स्थानमा छ ।

नयाँ वरीयतामा विश्व विजेता अमेरिका शीर्ष स्थानमा रहेको छ । यस्तै, जर्मनी दोस्रो, नेदरल्याण्ड तेस्रो, फ्रान्स चौंथो र इङ्ल्यान्ड पाँचौ स्थानमा छन् ।