पोखरा,  ६ चैत। सामुदायिक सेवा केन्द्र एवं सामुदायिक प्रहरी सेवा बैदामको आयोजनामा प्लाष्टिकको वैकल्पिक झोला सिलाइ तालिम शुरु भएको छ।

केन्द्रको कार्यालय हल्लनचोकमा शुरु तालिममा सो क्षेत्रका विभिन्न आमा समूहका २० जना प्रतिनिधिको सहभागिता छ।

प्रमुख अतिथि पोखरा ६ का वडाध्यक्ष जगतबहादुर पहारी र डिभिजन वन कार्यालय कास्कीका प्रमुख धनञ्जय लामिछानेले संयुक्त रुपमा तालिम उद्घाटन गरेका हुन्।

सात दिनसम्म चल्ने तालिममा प्रशिक्षक सामुदायिक सेवा केन्द्र एवं सामुदायिक प्रहरी सेवा बैदामका अध्यक्ष मीना भट्टराईले सिलाइबारे जानकारी दिने छन्।

उनको अध्यक्षतामा भएको कार्यक्रममा सामुदायिक सेवा केन्द्र एवं सामुदायिक प्रहरी सेवा कास्कीका कार्यबाहक अध्यक्ष बोधराज कार्की,  संस्थाका सल्लाहकार पम्फा पहारी,  मितेरी नारी समूहका अध्यक्ष मीरा पौडेल,  वडा प्रहरी कार्यालय बैदामका डिएसपी कमल शाहले वातावरण प्रदूषण नियन्त्रणमा तालिम फलदायी हुने बताएका थिए।

कार्यक्रममा स्वागत तालिम संयोजक ठाकुर बराल र संचालन सचिव नेत्रलाल भण्डारीले गरेका थिए।

तालिमपछि उत्पादित झालाहरु एक समारोह आयोजना गरी सो क्षेत्रका मानिसलाई निःशुल्क वितरण गरिने संस्थाकी अध्यक्ष भट्टराईले जानकारी दिइन्।