दमौली, २५ फागुन । तनहुँका ३० सामुदायिक घरबास व्यवस्थापन समितिले अनुदानका लागि डिभिजन वन कार्यालयसँग सम्झौता गरेका छन् ।

गण्डकी प्रदेशको उद्योग, पर्यटन, वन तथा वातावरण मन्त्रालयले सञ्चालनमा रहेका घरबासमा पर्यटन पूर्वाधारका लागि अनुदान दिन आह्वान गरेकोमा छनोट भएका ३३ मध्ये ३० ले कार्यालयसँग सम्झौता गरेका हुन् ।

कार्यालयका निमित्त डिभिजन वन अधिकृत बाबुराम उप्रेतीले अनुदानका लागि बाँकी रहेका घरबास व्यवस्थापन समितिलाई समेत सम्झौता गर्न आउन पत्राचार गरिएको जानकारी दिए । उनका अनुसार “अहिलेसम्म ३० घरबासका प्रतिनिधिले कार्यालयमा आएर सम्झौता गरेका छन् । बाँकीलाई समेत सम्झौता गर्न आउन पत्राचार गरिसकिएको छ ।”

सम्झौतापछि पहिलो किस्ताका रुपमा ४० प्रतिशत अर्थात चार लाख समितिको खातामा हाल्ने व्यवस्था कार्यविधिमा रहेको उल्लेख छ, सरकारले घरबास सञ्चालन गर्न अनुदान दिने १० लाखको १० प्रतिशत अर्थात एक लाख सम्बन्धित गाउँपालिका वा घरबास व्यवस्थापन समितिले अनिवार्य साझेदारी गर्नुपर्ने व्यवस्था कार्यविधिमा छ । तनहुँका ४३ घरबासले अनुदानका लागि प्रस्ताव पेश गरेकोमा ३३ छनोट भएका छन् ।