हेमजा । पूर्व पर्यटन राज्यमन्त्री महादेव गुरुङले विद्यार्थीले गर्ने अतिरिक्त क्रियाकलापको पनि मूल्यांकन हुनुपर्ने बताएका छन् ।

पोखरा २३ स्थित हर्पनकोट माविमा छात्रवृत्ति वितरण कार्यक्रमलाई सम्बोधन गर्दै गुरुङले विद्यार्थीको अतिरिक्त क्रियाकलापले विद्यालय तथा उक्त क्षेत्रको पहिचान राष्ट्रिय तथा अन्तर्राष्ट्रियस्तरमा बन्ने औल्याए । कला, संगीत, नृत्य, वाद्यवादन र खेलकुद लगायतका अतिरिक्त क्रियाकलापले सिकाइमा सकारात्मक प्रभाव पार्ने भन्दै पूर्व राज्यमन्त्री गुरुङले अबको शिक्षा किताबी मात्र नभई जीवनउपयोगी हुनुपर्नेमा जोड समेत दिए ।

त्यस अवसरमा कक्षा १ देखि ९ सम्मका १२ गरिब, जेहेनदार तथा लगनशील विद्यार्थीलाई एकमुष्ठ ५३ हजार २ सय वितरण गरिएको प्रअ कृष्णप्रसाद पोखरेलले जानकारी दिए ।

छात्रवृत्ति प्राप्त गर्ने विद्यार्थीमा कक्षा १ की रोशनी नेपाली, कक्षा २ की शिवानी गुरुङ, कक्षा ४ की सुमिना गुरुङ, कक्षा ५ का सम्झना सुनार र समीक्षा सुनार, कक्षा ६ का सुजित नेपाली, सोनी गुरुङ, कक्षा ७ की मनीषा नेपाली, कक्षा ८ का निशान भुजेल र सुवासी गुरुङ तथा कक्षा ९ का प्रवीण सुनार र वविता सुनार छन् । पूर्व राज्यमन्त्री गुरुङले उक्त विद्यालयमा आमा गंगादेवी गुरुङको स्मृितमा २०५८ सालमा १ लाख ५० हजार रुपैयाँको अक्षयकोष स्थापना गरेका थिए ।

कार्यक्रममा पूर्व नगर प्रमुख भोला थापा, बालगोपाल श्रेष्ठ, सविन गुरुङ, तीर्थ केसी लगायतले पनि धारणा राखे । विद्यालय व्यवस्थापन समिति अध्यक्ष हिमानसिहं गुरुङको अध्यक्षतामा भएको कार्यक्रममा शिक्षक शिव परियारले स्वागत र शिक्षक शिवप्रसाद पौडेलले कार्यक्रम सञ्चालन गरे ।