लेखनाथ । गण्डकी मिजार समाज पोखरा–२६ सक्नेरीले बिहीबार आयोजना गरेको कार्यक्रममा ६८ युनिट रगत संकलन भएको छ ।

कार्यक्रमको शुभारम्भ गर्दै पोखरा महानगरपालिका वडा नम्बर २६ का वडाध्यक्ष नरेन्द्र थापाले एक पोका रगतले गर्दा २ जनालाई बचाउन सकिने भएकाले रक्तदान गर्न र अरुलाई पनि बेला बेलामा रक्तदान गर्नुपर्छ भन्ने कुरा सिकाउन आग्रह गरे ।

वडाध्यक्ष थापाले समाजले गर्दै आइरहेका गतिविधिहरुलाई आफूले विगतदेखि नै नियालिरहेको बताउँदै समाज परिवर्तनका धेरै कार्यहरु गर्दै आइरहेकोमा प्रशंसा गरे । वडाको तर्फबाट समाजको निर्माणाधीन भवनलाई सम्पन्न गर्न आगामी आर्थिक वर्षमा केही रकम छुट्याउने प्रतिवद्धता समेत व्यक्त गरेका छन् ।

कार्यक्रममा धादिङ सम्पर्क समाजका अध्यक्ष राजु पाण्डे, महासचिव हरि पन्त, लेखनाथ पत्रकार मञ्चका संस्थापक अध्यक्ष भिमपाणि बराल, लेखनाथ निर्माण व्यवसायी समितिका वरिष्ठ उपाध्यक्ष भीम नेपाली ‘काइँला’ लायन्स क्लब इन्टरनेसनल ३२५ जे का डिस्ट्रिक्ट अफिसर रामचन्द्र सेढाईं, मिजार समाज गण्डकीका सल्लाहकार तीलक रोका लगायतले बोलेका थिए ।

संस्थाका अध्यक्ष गोपाल नेपालीको अध्यक्षतामा समपन्न कार्यक्रम उपाध्यक्ष मनबहादुर चर्मकारले स्वागत र सल्लाहकार बुद्धराज बस्यालले सञ्चालन गरेका थिए ।