पोखरा । ढाका र करुवा पाल्पाका खास चिनारी हुन् । तर यसको खास बजारीकरण हुन सकेको छैन । पोखरामा बसोबास गर्ने पाल्पालीहरुले पाल्पाली ढाका, करुवा सहित त्यहाँका उत्पादन पोखरा भित्राएका छन् । त्यो पनि सुपथ मूल्यमा ।

हुन त पाल्पा र पोखराको पुरानो सम्बन्ध हो । पहिले पोखरेली पढ्न पाल्पा जान्थे । समयक्रमसँगै विभिन्न कामकाजको सिलसिलामा पाल्पालीहरु पोखरा झरे । पाल्पा जिल्ला घर भई हाल पोखरामा विभिन्न पेसा, व्यवसाय, अध्ययनको सिलसिलामा उनीहरुले पाल्पाली समाज पोखरा स्थापना गरे । सम्पर्क समाजमा यो सबैभन्दा पुरानो पनि हो । समाजकै पहलमा पाल्पा हाउस प्रालि, पाल्पाली बहुउद्देश्यीय सहकारी संस्था र पाल्पाली कोलोनी खुलेका छन् ।

पाल्पा हाउस प्रालिले करिब २ करोड लागतमा पोखराको न्युरोडमा पाल्पा हाउस सञ्चालनमा ल्याएको छ । प्रेमको प्रतीक रानीमहलको स्वरुपमा निर्मित दुईतले भवनमा पाल्पाली ढाका, करुवा लगायत पाइने छन् ।

कम्पनी अध्यक्ष कुलप्रसाद घिमिरेले पाल्पाका मौलिक उत्पादन पोखरामा बिक्री गर्ने उद्देश्यले पाल्पा हाउस संचालन गरिएको बताए । १० वर्षको लागि जग्गा लिजमा लिएर निर्मित पाल्पा हाउसमा १७ सटरमा विभिन्न खालका पसल संचालित छन् । कम्पनीले संचालन गरेको रानीमहल रेस्टुरेन्टमा पाल्पाली परिकार चुकाउनी, बटुक, छोइला लगायत पस्किने छ । यस्तै पाल्पा हाउसमा पाल्पाका फलफूल, तरकारी लगायतका कृषिजन्य उत्पादनहरु एकैथलोमा उपलब्ध हुनेछ ।

करिब २ करोड लागतमा पोखराको न्युरोडमा पाल्पा हाउस सञ्चालनमा आएको हो

यसले पाल्पा र पोखराको पर्यटनसहित आर्थिक गतिविधिमा ठूलो महत्व राख्ने विश्वास गरिएको पाल्पाली बहुउद्देश्यीय सहकारी संस्था अध्यक्ष चिरञ्जीवी श्रेष्ठले बताए ।

पाल्पाली समाज पोखराका अध्यक्ष रेशम थापाले आर्थिक गतिविधिसँगै पर्यटन पर्यटनमा यसले विशेष महत्व राख्ने बताउँछन् । उद्घाटनपछि केही समय हरेक सटर र रेष्टुरेन्टमा ग्राहकलाई १० प्रतिशत छुटको व्यवस्था मिलाइएको बुधबार आयोजित पत्रकार सम्मेलनमा संचालकमध्येका एक खेम सारुले बताए । पाल्पा हाउसले २ जिल्लाको मात्र पर्यटन प्रवद्र्धन नभइ समग्र गण्डकी र लुम्बिनी प्रदेशकै प्रवद्र्धनमा टेवा दिने कम्पनीको विश्वास छ । पाल्पा हाउस मुलुकका विभिन्न सहरमा पनि बिस्तार गर्दै जाने लक्ष्य रहेको कम्पनी अध्यक्ष घिमिरेले बताए । पाल्पा हाउसमा हाल ७० जना सेयर सदस्य छन् ।

पाल्पा हाउसको शुक्रबार पोखराका मेयर धनराज आचार्य र तानसेन नगरपालिकाका प्रमुख सन्तोषलाल श्रेष्ठले संयुक्त उद्घाटन गर्ने छन् ।