पोखरा । पोखरा महानगरपालिका र घोराही उपमहानगरपालिकाको न्यायिक समितिबीच अनुभव आदानप्रदान गरिएको छ । घोराहीका उपप्रमुख हुमकुमारी डिसीको नेतृत्वमा आएको न्यायिक समितिले पोखराका उपप्रमुख मञ्जुदेवी गुरुङसँग भेट गर्दै न्याय सम्पादनबारे अनुभव आदानप्रदान गरेका छन् ।

घोराहीको टोलीमा प्रमुख प्रशासकीय अधिकृत भोजराज घिमिरे, वडा सदस्य राजीवराज हौजली, धर्मराम चौधरी, मोहनराज आचार्य, लक्ष्मण अधिकारी, उपेन्द्र अंगेलि, ओमप्रकाश बस्तेत, गोपाल खड्का, तारा पुरी सहभागी थिए । पोखराका तर्फबाट न्यायिक समिति सदस्य भावना श्रेष्ठ र समितिका अभिलेख संरक्षक राममणि अधिकारी सहभागी थिए ।

भेटमा पोखराका उपप्रमुख गुरुङले महानगरले न्यायिक समितिमा आउने विवादका प्रकृति, विवादको अवस्थालगायत समग्र विषयमा जानकारी गराएकी थिइन् ।

पोखरा महानगरमा मानाचामल, जग्गा खिचलो, ज्येष्ठ नागरिकलाई पालनपोषण नगरेको, साँध सिमाना मिचेको लगायत विवाद बढी आउने गरेका छन् । उपमेयर गुरुङले विवाद समाधानका लागि वडाहरुमा मेलमिलाप केन्द्र स्थापना, मेलमिलापकर्ताको सूचीकरणबारे जानकारी गराइन् ।