पोखरा। उपराष्ट्रपति पदको निर्वाचनको लागि मतदान जारी छ । नयाँ बानेश्वरस्थित संसद भवन परिसरमा बिहान १० बजेदेखि सुरु भएको मतदान दिउँसो ३ बजेसम्म चल्ने छ ।

गण्डकी प्रदेशका प्रदेश सभा सदस्य प्रकाश बरालले किरियापुत्रीकै अवस्थामा उपराष्ट्रपतिको निर्वाचनमा भाग लिएका छन् । मतदानका लागि उनी बिहान बुद्ध एअरको जहाज चढेर काठमाडौं गएका हुन् ।

आफ्नो पार्टीको आग्रह तथा मतदाताले आफूप्रति गरेको भरोसाका कारण किरिया बसेकै अवस्थामा पनि भोट हाल्न आएको उनले संचारकर्मीलाई बताएका छन् ।

पोखरा २२ स्थायी घर भएका सांसद बरालका बाबु लोकराजको ८२ वर्षको उमेरमा गत २६ फागुनमा निधन भएको थियो । नेपाली कांग्रेसका प्रकाश बराल गत ४ मंसिरको प्रदेश सभा चुनावमा कास्की क्षेत्र ३ (२) बाट निर्वाचित भएका हुन् ।

उपराष्ट्रपति निर्वाचनमा एमालेकी अष्टलक्ष्मी शाक्य (बोहरा) तथा सत्ता गठबन्धनको तर्फबाट जसपाका रामसहायप्रसाद यादव, जसपाकै प्रमिलाकुमारी यादव र जनमत पार्टीकी ममता झा उम्मदवार छन् । तर जसपाकी प्रमिलाले आफ्नो उम्मेदवारी निष्कृय भएको यसअघि बताइसकेकी थिइन् ।

गएको २५ फागुनमा भने सत्ता गठबन्धनतर्फबाट नेपाली कांग्रेसका वरिष्ठ नेता रामचन्द्र पौडेल राष्ट्रपति निर्वाचित भइसकेका छन् ।