पोखरा । प्रेस चौतारी नेपालले २५ औं स्थापना दिवस अवसरमा आइतबार देशभर विविध कार्यक्रम गरी मनाएको छ । प्रेस चौतारी नेपाल गण्डकी प्रदेश कमिटी र कास्की शाखाले बालगृहमा आश्रित बालबालिकालाई स्टेसनरी सामाग्री वितरण गरी स्थापना दिवस मनाए ।

पोखरा–१७ महतगौंडास्थित सृजना बालगृहमा संरक्षित १२ जना बालबालिकालाई १३ हजार मूल्य बराबरको स्टेशनरी सामाग्री वितरण गरियो । विद्यार्थीलाई आवश्यक पर्ने विभिन्न प्रकारका कापी, कलम, सिसाकलम, रङ, ज्यामितीय बाकससहितका पाठ्यसामग्री वितरण गरिएको हो ।

प्रेस चौतारी कास्कीका संस्थापक अध्यक्ष एवं प्रेस स्वतन्त्रता सेनानी पुण्य पौडेलले चौतारीका सदस्यले आफ्नो स्थापना दिवसका अवसरमा बालगृहमा संरक्षित बालबालिकालाई शिक्षामा सहयोग पुग्ने गरी गरेको कार्य महान रहेको बताए । उनले सानो काम भए पनि यसको सन्देश ठूलो रहेको उल्लेख गरे ।

सृजना विकास केन्द्र अध्यक्ष कृष्णबहादुर थापाले पत्रकारले सामाजिक काममा सक्रियता देखाएको भन्दै खुसी व्यक्त गरे ।

सृर्जना विकास केन्द्रका निवर्तमान अध्यक्ष समेत रहेका प्रेस चौतारी गण्डकी अध्यक्ष इन्द्रप्रसाद पौडेलको अध्यक्षतामा भएको कार्यक्रममा बालगृह संयोजक सोमनाथ बरालले स्वागत एवं कास्की शाखा अध्यक्ष अर्जुन गिरीले कार्यक्रममाथि प्रकाश र सचिव रञ्जन अधिकारीले सञ्चालन गरेका थिए ।

संगठन केन्द्रीय सचिव एवं प्रदेश इञ्चार्ज सुष्मा पौडेल, केन्द्रीय सदस्य एवं कास्की इन्चार्ज रुद्र श्रीसमगर, पूर्व अध्यक्ष श्याम कुँवर, अग्रज दीपेन्द्र श्रेष्ठ लगायतले विद्यार्थीलाई स्टेसनरी सामग्री वितरण गरे ।