पोखरा । गण्डकी प्रदेश सभाको अधिवेशन पुस १८ गते सुरु भए पनि बैठकमा सांसदहरुले भनाइ राख्ने माहोल नै मिलेको थिएन । मुख्यमन्त्रीले विश्वासको मत लिने, सभामुख, सभामुखको निर्वाचन कार्यासूचीमा परेकाले शून्य समय र विशेष समय नै छुट्याइएन । सरकारले पूर्णता पाएपछि सदन माघ १९ गतेबाट बसेको छ । जसमा सांसदहरुले मन खोलेर भनाइ राख्न पाएका छन् ।

शून्य समय र विशेष समयमा बोल्नै सांसदको सूची लामै पुगेको छ । नागरिकले भोग्नु परेका समस्या, असन्तुलित विकासदेखि प्रदेश संरचनाको औचित्यमाथि खडा भएका प्रश्नका बारेमा समेत उनीहरुले आवाज उठाएका छन् ।

शुक्रबारको बैठकमा सांसद डिल्लीराम सुवेदीले प्रदेश संरचनालाई संघ र पालिकाले गरेको व्यवहार ठिक नभएको बताए । विशेष समयमा बोल्दै उनले भने, ‘ट्राफिक प्रहरीले गण्डकीबाट उठाएको ३० करोड संघीय सञ्चित कोषमा जम्मा भएको छ । त्यो रकम फिर्ता पटक पटक मागेको छ । तर संघ सरकार दिँदैन । पोखरा महानगरपालिकाले प्राकृतिक श्रोत साधन बेचविखन गरेबापत दिनुपर्ने १५ करोड रुपैयाँ प्रदेश सरकारलाई दिँदैन । हामी कति हेपिएर बस्ने हो ? संघीय सरकारले पनि हाम्रो दायित्व पूरा गर्दैन, स्थानीय सरकारले पनि समन्वय गर्दैन ।’

प्रधानमन्त्रीको अध्यक्षतामा बस्ने अन्तर प्रदेश समन्वय परिषद र मुख्यमन्त्रीको अध्यक्षतामा बस्ने प्रदेश समन्वय परिषद्को बैठक तत्कालै बस्ने प्रबन्ध मिलाउन उनले मुख्यमन्त्रीको ध्यानाकर्षण गराए ।

सांसद महेन्द्रध्वज जिसीले प्रदेश सभामा उठाएका विषयहरु संघ सरकारसम्म पु¥याउन आग्रह गरे । ‘राष्ट्रिय निकुञ्ज संघ सरकार मातहत पर्छ । प्रदेश अन्तर्गत पर्दैन । हामीले जनसरोकारका कुरा उठाउछौं,’ उनले भने, ‘यी सवालहरु प्रदेश सरकारले केन्द्रमा पु¥याउने हो कि हामी नै झोला बोकेर केन्द्रमा जान पर्ने हो ?’ उनले किसानले बाली जोगाउन अत्यधिक विषादी खेतबारीमा प्रयोग गर्दा त्यही खाएर धेरै गैंडाको मृत्यु भएको बताएका छन् । ‘प्राकृतिक रुपमा पनि असारदेखि यता १२ गैंडाको मृत्यु भएको छ । प्राकृतिक रुपमै मृत्युदर बढेको छ । जन्मपछि मृत्यु स्वभाविक हो, तर हामी मान्दैनौं,’ उनले भने, ‘किसानले बाली जोगाउन अत्यधिक विषादी प्रयोग गरेको र त्यो विषादी गैंडाले खाएर मृत्युदर बढेको भन्ने हाम्रो बुझाइ छ ।’ उनले वन्यजन्तु र मानवबीच द्वन्द्व बढ्दै गएकोले नियन्त्रण गर्न प्रदेश सरकारको ध्यानाकर्षण गराए ।

सांसद प्रकाश बरालले पोखरा अन्तर्राष्ट्रिय विमानस्थलको भविष्यबारे प्रश्न गरे । अंग्रेजी नयाँ वर्षको अवसरमा पोखरा अन्तर्राष्ट्रिय विमानस्थलको उद्घाटन भए पनि अहिलेसम्म अन्तर्राष्ट्रिय उडान भएको छैन । चिनियाँ पक्षबाट उक्त परियोजना ‘बेल्ट रोड इनिसियटीभ’ अन्तर्गतको परियोजनाका रुपमा दाबी गरेपछि अन्तर्राष्ट्रिय उडानमा अवरोध भएको उनको तर्क छ । ‘बिआरआई प्रोजेक्ट हो भने नेपाल सरकार र प्रदेश सरकारबाट किन आधिकारिक धारणा आएको छैन ? यसको लगानीको बारेमा अझै प्रष्टता छैन,’ उनले भने, ‘यो लगानीको हालसम्मको ब्याज, किस्ता र बिआरआईसँगको रिस्ता के हो ? यसबारे म जवाफ माग गर्दछु ।’

सांसद फडिन्द्र देवकोटाले गोरखाको पालुङटार र आसपासका क्षेत्रलाई पोखरापछिको वैकल्पिक सहरका रुपमा विकास गर्न माग गरेका छन् । प्रदेश सभाको विशेष समय लिएर उनले उक्त प्रस्ताव राखेका हुन् । ‘एक ताका नेपालकै राजधानी बनाउने चर्चा भएको क्षेत्र गोरखा, लमजुङ र तनहुँको भुगोल छ हाम्रो गण्डकी प्रदेशसँग,’ उनले भने, ‘पोखरा पछिको वैकल्पिक सहरको रुपमा पालुङटार र वरपरको क्षेत्रलाई पहल गरियोस् भनि विशेष प्रश्ताव गर्न चाहन्छु ।’ यसअघि लामो समय सञ्चालन भएर बन्द अवस्थामा रहेको पालुङटार एयरपोर्ट तुरुन्त सञ्चालन गर्न आग्रह गरे ।

सांसद मित्रलाल बस्यालले आवश्यकता पहिचान नगरी क्याम्पस खोल्दा अहिले सञ्चालनमा समस्या भएको सुनाए । ‘पर्वतको क्षेत्र नम्बर २ अन्तर्गत ३० वटा वडामा ७ वटा क्याम्पस छन् । हिजो रहर मानेर खोल्यौं । क्याम्पस खुलेपछि भवन बनाउन पैसा जान्छ, सञ्चालनका लागि पैसा छैन,’ उनी भन्छन्, ‘भवन जति पनि छन्, विद्यार्थी छैनन् । बन्द गर्न भएन, थोरै भएपनि विद्यार्थी छन् । शिक्षक पाल्नै प¥यो । क्याम्पसको अवस्था बहुत दयनीय छ । कि खारेज होस्, नत्र चल्न पुग्ने पैसा दिनुपर्‍यो ।’

श्यामराजा महतले तनहुँ, स्याङजा र कास्कीको सीमाना पुँडीटारमा तत्कालै औद्योगिक क्षेत्र सञ्चालन गर्न आग्रह गरे । डिपिआर तयार भैसकेकोले त्यस क्षेत्रमा उद्योगका साथै कृषि मल कारखाना राख्न उनको आग्रह छ । अर्का सांसद सुधिर पौडेलले स्याङजामा सुन्तला कुहिएर किसान मर्कामा परेको भन्दै क्षतिपुर्तिको माग गरे । यो वर्ष स्याङजाबाट मात्रै २२ हजार २ सय ७५ टन सुन्तला उत्पादन भएको छ । एकै वर्ष १ अर्व ५५ करोडको सुन्तला उत्पादन भएको कृषि ज्ञान केन्द्रले जनाएको छ । त्यसमध्ये १ अर्व १ करोडको सुन्तला बिक्री भइसकेको छ । बाँकी सुन्तला चिस्यान केन्द्रमा राखिएकोमा कुहिएर फाल्नुपरेको गुनासो किसानले गरेका छन् । जिल्लाभरीबाट २ सय ९३ टन सुन्तला विग्रिएर नष्ट भएको सांसद पौडेलले जानकारी दिए । उनका अनुसार ४३ लाख २० हजार रुपैयाँ किसानलाई क्षति भएको छ । ,

विशेष समयमा डा. टकराज गुरुङ, लिलबहादुर थापा, हरिबहादुर भण्डारी, बिन्दु अधिकारी पहाडी, पद्मा जिसी श्रेष्ठ, रेखा गुरुङ, मित्रलाल बस्याल, देवका पहारी त्रिपाठीसमेत १३ जनाले बोले । शून्य सयमा भक्तबहादुर कुँवर, भोजराज अर्याल, महेश भट्टराई, लक्ष्मणबहादुर पाण्डे, सरस्वती गुरुङ, श्यामराजा महतसमेत १० जनाले भनाइ राखे ।