पोखरा। नेपाल क्रिकेट संघ (क्यान) मा विद्यमान विवादबीच पोखरामा बसेको संघको बोर्ड बैठकले महत्वपूर्ण विभिन्न निर्णय गरेको छ । क्यानका विभिन्न १३ निर्णयमध्ये सन्दीप लामिछानेको निलम्बन फुकुवादेखि अध्यक्षको राजीनामा मागमा विषयले क्यान पुनः एकपल्ट निलम्बन खतरामा परेकोमा चिन्ता व्यक्त गरिएको छ ।

पोखरामा मंगलबार बसेको क्यानको बोर्ड बैठकले नेपाली यु–१९ राष्ट्रिय क्रिकेट टिमको कप्तानमा गुल्सनकुमार झालाई मनोनयन गर्ने निर्णय गरेको छ । यस्तै संघको वार्षिक साधारणसभामा आगामी फागुन १४ र १५ गते सुर्खेतमा गर्ने भएको छ । संघको विशेष साधारणसभामा भने आगामी २०८० जेठभित्र आयोजना गरी जिल्ला, प्रदेश र केन्द्रीय कार्यसमितिको निर्वाचन गर्ने निर्णय गरिएको छ ।

यसैगरी, क्यानले सन् २०२३ जनवरीदेखि जुनसम्म ६ महिनाको लागि १८ पुरुष र १२ महिला खेलाडीलाई केन्द्रीय करारमा राख्ने निर्णय गरेको छ । जसमा ज्ञानेन्द्र मल्ल ग्रेड ‘बि’ मा परेका छन् ।

ग्रेड ‘ए’ अन्तर्गत रोहित पौडेल, सोमपाल कामी, करण केसी, दीपेन्द्रसिंह ऐरी, आशीफ शेख परेका छन् । ग्रेड ‘बि’मा मल्लसहित आरिफ शेख, कुशल भूर्तेल छन् भने ग्रेड ‘सि’ मा कमलसिंह ऐरी, विनोद भण्डारी, गुल्सनकुमार झा, अर्जुन साउद, अविनाश बोहरा, ललितनारायण राजवंशी, कुशल मल्ल, देव खनाल, सागर ढकाल र विवेक यादव छन् ।

महिला खेलाडीमा करारमा पर्नेमा १२ मध्ये ग्रेड ‘ए’ मा रुविना क्षेत्री, सीता रानामगर र इन्दु बर्मा छन् । ग्रेड ‘बि’ मा काजोल श्रेष्ठ, कविता कुँवर र अस्मिना कर्माचार्य तथा ग्रेड ‘सि’ मा कविता जोशी, बिन्दु रावल, संगीता राई, ममता चौधरी, ज्योति पाण्डे, अप्सरी बेगमलाई करारमा राख्ने निर्णय गरिएको हो ।

बुधबार पत्रकार सम्मेलन गरी बैठकका निर्णय सार्वजनिक गर्दै क्यान अध्यक्ष चतुरबहादुर चन्दले थप २ जिल्लालाई मान्यता दिएको छ । बागलुङ र पर्वत जिल्ला क्रिकेट संघ तदर्थ समितिलाई मान्यता दिने निर्णय गर्दै अनुमोदनका लागि आगामी वार्षिक साधारणसभामा पेस गर्ने बताइएको छ ।

नेपाली राष्ट्रिय क्रिकेट टोलीका पूर्व कप्तान सन्दीप लामिछानेको निलम्बन फुकुवा गर्ने निर्णयसमेत बैठकले गरेको छ । नावालिका बलात्कार आरोप खेपिरहेका लामिछानेलाई २ साताअघि उच्च अदालत पाटनले २० लाख धरौटीमा रिहा गर्ने आदेश दिएको थियो ।

यसैगरी, पूर्व प्रहरी नायब महानिरीक्षक ईश्वरबाबु कार्कीको संयोजकत्वमा संघका एन्टि करप्सन अफिसर रितेश सिंह र थप १ जना सदस्य पछि मनोनयन गर्ने गरी ३ सदस्यीय क्यान इन्टिग्रेटी कमिटी गठन गर्ने निर्णय पनि बैठकले गरेको छ । नेपाल टी–२० प्रतियोगिता सम्पन्न भइसकेकोले गभर्निङ काउन्सिल बिघटन गरेको छ भने सेभेन थ्रि स्पोर्टस् प्रालिसँगको सम्झौतालाई निरन्तरता दिन नसक्ने स्थिति भएकोले आगामी साधारणसभामा निर्णयार्थ पेस गर्ने निर्णय गरेको अध्यक्ष चन्दले जनाए ।

संघमा कार्यवाहक सचिव प्रशान्तविक्रम मल्लको राजीनामा बोर्डले अनुमोदन गर्दै सो पदमा दुर्गाराज पाठकलाई जिम्मेवारी तोक्ने निर्णय गरेको छ । स्पट फिक्सिङमा संलग्न खेलाडी र व्यक्तिहरुको आरोप पुष्टीपश्चात आइसिसी र क्यानको कोड अफ कन्डक्ट बमोजिम कारबाही अघि बढाइने भएको छ ।

क्यानमा हाल निर्वाचित १५ सदस्यमध्ये ५ जनाले नेपाल टि–२० लिगको विषयलाई लिएर अध्यक्ष लगायत कार्यसम्पादन समितिका सदस्यको राजीनामा माग गर्दै पोखरा बैठक बहिस्कार गरेकोमा क्यान फेरि निलम्बनको खतरामा जाने महसुस गर्दै चिन्ता व्यक्त गरिएको छ । केन्द्रीय सदस्यहरु ऋषिराम गौतम, दाउद अन्सारी, करण महतरा क्षत्री, सञ्जयराज सिंह, अमीतवीर पाण्डे, छुम्बी लामा र धर्मराज गिरीले बैठक बहिस्कार गर्दै मंगलबार पत्रकार सम्मेलन गरेका थिए ।

आगामी दिनमा कमीकमजोरी सच्चाउँदै एकजुट भएर अघि बढ्नका लागि सहकार्यमा जान बैठकले असन्तुष्ट पक्षलाई आग्रह गरेको छ । एभरेस्ट प्रिमियर लिगका संचालक आमीर अख्तर लगायतले क्यान र अध्यक्ष चन्दको नाममा सर्वोच्चमा दायर गरेको रिट फिर्ता लिन पनि क्यान बैठकले आग्रह गरेको छ ।

राजीनामा माग्नु गलत: अध्यक्ष चन्द
क्यान अध्यक्ष चतुरबहादुर चन्दले राजीनामा माग गर्नु गलत भएको भन्दै प्रक्रियामा आउन आग्रह गरेका छन् । ‘क्यानको झगडाले निलम्बनको खतरामा पर्नु हुँदैन,’ पत्रकार सम्मेलनमा चन्दले भने, ‘हामीहरु मिलेर जान तयार छौं । असन्तुष्ट पक्षलाई वार्ताको टेबलमा आउन आग्रह गर्दछौं । विरोधमात्र गरेर हुँदैन । बैठकमा बस्नु पर्‍यो ।’

काठमाडौंमा ब्यानर बनाएर यहाँ आएर पत्रकार सम्मेलन गर्नुले नियत प्रष्ट भएको उनको टिप्पणी छ । नेपाली क्रिकेट ध्वस्त पार्ने खेल हो भन्दै उनले फेरि निलम्बनको खतरामा रहेको बताउँछन् । मैले फोन गरेर आउन भने तर आउँछु भनेकाले आएनन् ।

‘नेपाली क्रिकेट ग्रासरुट ध्वस्त भयो । यु–१९ गएको २०१६ देखि १९ सम्म निलम्बन थियो । ग्रासरुट यु–१६ हुँदै भएन । यु–१९ नहुँदा ग्रासरुट ध्वस्त हुन पुग्यो । जिल्ला, क्षेत्रबाट क्रिकेट भएन । तलबाट बच्चा आउन सकेनन् भने नेपाली क्रिकेट उँभो लाग्दैन,’ उनले चिन्ता व्यक्त गरे । क्यान विवादमा रुमल्लिइरहेको विषयमा उनले दक्षिण एशियामा सरकार चलाउन सजिलो होला, तर संघ चलाउन गाह्रो छ भने ।

आफू पदका लागि कहिल्यै पनि राजनीति नगर्ने चन्द दाबी गर्छन् । सुदूरपश्चिमको मान्छेले क्यानलाई ब्यालेन्स ल्याएको हो भन्दै उनले आफू बाहेक अरुले यसरी ब्यालेन्समा ल्याउन नसक्ने बताउँछन् । क्यानका सदस्यले विशेष साधारणसभा बोलाउन माग गरे आफूहरु ३५ दिनभित्र बोलाउन तयार रहेको उनको भनाइ छ । क्यानमा हाल ८० साधारण सदस्य छन् । त्यसमध्ये कुल सदस्य संख्याको ३३ प्रतिशतले विशेष साधारणसभा बोलाउन सक्ने प्रावधान छ । संघका ७ केन्द्रीय सदस्यले नेपाल टी–२० लिगको विषयलाई लिएर अध्यक्ष चन्दको राजीनामा मागेका थिए ।

यस्तै, कार्यवाहक सचिवबाट राजीनामा दिएका प्रशान्तविक्रम मल्लले आफू संघमा नहुँदा संघको हित उन्नति हुन्छ भने सदा तयार रहेको बताए । उनले कार्यसमिति बैठकमा आफ्नो राजीनामा दिएका थिए ।