पोखरा । मेसीको टिम अर्जेन्टिना विश्वकप फुटबल प्रतियोगिताको सेमिफाइनल प्रवेश गरेको छ । नेदरल्याण्डलाई टाइब्रेकरमा ४–३ गोलअन्तरले पराजित गर्दै अर्जेन्टिनाले फाइनल प्रवेशका लागि क्रोयसियाको भेट सुनिश्चित गरेको छ ।

नेपाली समयअनुसार शनिबार बिहान पौने ४ बजे सम्पन्न दोस्रो क्वाटरफाइनलमा अर्जेन्टिनाको जीतसँगै उसका समर्थकले लामो समयसम्म कतारी रंगशाला गुञ्जायमान बनेको थियो । अर्जेन्टिनी गोलरक्षक एमिलियानो मार्टिनेजले विपक्षीका २ पेनाल्टीको उत्कृष्ट बचाउ गर्न सके ।

निर्धारित समयमा २–२ को बराबरी खेलेका यी दुवै टिमको प्रतिस्पर्धा निकै रोचक थियो । अर्जेन्टिनाको जीतमा रेफ्रीले ह्वीसल फुक्ने तयारी गर्नै लाग्दा दोस्रो हाफको इन्जुरी टाइमको अन्तिम मिनेटमा हल्याण्डले उत्कृष्ट पुनरागमन ग¥यो ।

खेलको ३५ औं मिनेटमा मोलिनाले मेसीको फिंगरप्रिन्टलाई वान टचमा गोल गर्दै टिमलाई अग्रता दिलाएका थिए । पहिलो हाफ १–० गोलअन्तरमा सकिएकोमा ७३ औं मिनेटमा मेसीले पेनाल्टीमा गोल गर्दै गोलअन्तर दोब्बर पारेका थिए ।

तर ८३ औं मिनेटमा नेदरल्याण्डका लागि वीगोस्टले हेडमार्फत सुन्दर गोल फर्काए । दोस्रो हाफको इन्जुरी टाइममा वीगोस्टले विपक्षी पोष्टमा बलले जाली चुमाएपछि नेदरल्याण्ड चमत्कारिक रुपमा खेलमा फर्किएको थियो । अतिरिक्त समयको ३० मिनेटमा कुनै पनि टिमले गोल गर्न नसकेपछि निर्णयार्थ टाइब्रेकरको सहारा लिनुपरेको थियो ।

शुक्रबार राति पहिलो क्वाटरफाइनलमा ब्राजिल क्रोयसियासँग टाइब्रेकरको शिकार बन्दै बाहिरिएपछि उपाधि दाबेदार अर्जेन्टिनाले क्रोयसियासँग पहिलो सेमिफाइनलमा प्रतिस्पर्धा गर्ने भएको हो ।