पोखरा । लैंगिक हिंसाविरुद्धको १६ दिने अभियानको अवसर पारेर लैंगिक हिंसा न्यूनीकरणमा स्थानीय निकायको भूमिकाबारे छलफल भएको छ । पोेखरा ८ को आयोजना तथा आमा मीलन केन्द्रको समन्वयमा कार्यक्रम भएको हो ।

कार्यक्रम उद्घाटन गर्दै प्रतिनिधि सभा सांसद् विद्या भट्टराई अधिकारीले संविधानमा उल्लेख गरिएका महिलाका समग्र सवाललाई कार्यान्वयनमा ल्याउन आफू निरन्तर लागि परेको र अबका दिनमा थप ऊर्जाका साथ लाग्ने प्रतिबद्धता जनाइन् । कार्यक्रममा लैंगिक असमानताका मुख्य कारण, लैंगिक असमानताका कारण घर परिवार र समाजमा परेको प्रमुख असर, लैंगिक असमानताले निम्तिएका हानिकारक अभ्यासहरु र सभ्य समाज सिर्जना गर्न स्थानीय समुदायको भूमिकाबारे ४ समूह बनाइ छलफल गरिएको थियो ।

कार्यक्रममा पोखरा ८ का वडा सदस्य हीराकाजी श्रेष्ठ, गोविन्द बराल, महिला सदस्य पवित्रा पौडेल केसी, दलित महिला सदस्य लक्ष्मी विक, नारी परोपकार केन्द्रका अध्यक्ष शारदा गिरीलगायतले बोलेका थिए । लैंगिक हिंसाको १६ दिने अभियानसहित नेतृत्वमा महिलाहरुको अर्थपुर्ण सहभागिताका विषयमा पोखरा ८ का वडा सचिव सविता ढुंगानाले सहजीकरण गरेकी थिइन् । आमा मिलन केन्द्रका अध्यक्ष इन्दिरा पौडेलको अध्यक्षतामा भएको उक्त कार्यक्रमको सञ्चालन संस्थाकै सचिव रजनी रिमालले गरेकी थिइन् । कार्यक्रममा २२ वटा स्थानीय संघ संस्थाका प्रमुख तथा प्रतिनिधि गरी ६५ जनाको सक्रिय सहभागिता थियो ।