पोखरा । कन्या क्याम्पसमा जारी सामुदायिक क्याम्पसस्तरीय छात्रा भलिबल प्रतियोगितामा कन्या क्याम्पस ‘क’ र जनप्रिय बहुमुखी क्याम्पस फाइनलमा प्रवेश गरेका छन् ।

कन्या क्याम्पसको ३१ औं वार्षिकोत्सव अवसरमा कन्या क्याम्पस प्राध्यापक संघद्वारा आयोजित प्रतियोगितामा कन्याले चौंथो क्वाटरफाइनलमा शिवशक्ति क्याम्पसलाई २–० सोझो सेटमा हराएर सेमिफाइनल प्रवेश गरेको थियो । सेमिफाइनलमा कालिका पब्लिकलाई पनि २–० को सोझो सेटमा पराजित गरी फाइनल प्रवेश गरेको हो ।

सोमबार नै तेस्रो क्वाटरफाइनलमा कन्या ‘ख’ लाई पराजित गर्दै सेमिफाइनल प्रवेश गरेको विन्ध्यवासिनी क्याम्पस सेमिफाइनलमा जनप्रिय क्याम्पससँग पराजित भएको थियो । पहिलो सेमिफाइनलको प्लेअर अफ द म्याच विन्ध्यवासिनी क्याम्पसकी क्याप्टेन मविना सन्त्याल भएकी थिइन् भने दोस्रोमा कन्या क्याम्पस ‘क’ की क्याप्टेन रसिला पुर्जा भएकी थिइन् । तेस्रो स्थानका लागि विन्ध्यवासिनी क्याम्पस र कालिका पब्लिक कलेजबीचमा तथा फाइनल कन्या क्याम्पस ‘क’ र जनप्रिय बहुमुखी क्याम्पसबीच हुनेछ ।