पोखरा । गण्डकी प्रदेशका शिक्षा, संस्कृति, विज्ञान, प्रविधि तथा सामाजिक विकास मन्त्री मेखलाल श्रेष्ठले महिला हिंसा अन्त्यका कडा कानुन बनाउनुपर्ने बताएका छन् । लैंगिक विभेदमा आधारित हिंसाविरुद्धको १६ दिने अभियानअन्तर्गत ‘लैंगिक हिंसा न्युनीकरणमा मिडिया र सरोकारवालाको भूमिका’ विषयक अन्तरक्रिया उनले कडा कानुन बनाएर लागु गरेमा महिला हिंसा कम हुने बताए ।

‘महिला हिंसा अन्त्यका लागि सबैभन्दा पहिला कानुन दह्रो बनाउनुपर्‍यो,’ उनले भने, ‘अनि त्यो कानुन कार्यान्वयन गर्ने निकायले निष्पक्ष भएर कार्यान्वयन गर्ने हो भने यो समाजका धेरै हिंसा, अवहेलना र विकृति विसंगति घटाउन सकिन्छ ।’ यसका लागि सरकारी पक्ष, पत्रकारसँगै अन्य क्षेत्रले बहस गर्ने बेला आएको उनको भनाइ थियो । यसको न्युनीकरणका लानि कानुन नै परिमार्जन गर्नुपर्ने उनले बताए ।

हिंसा न्युनीकरण गर्ने भन्दै अभियान सञ्चालनमात्र नगरी हिंसाको जड नै पत्ता लगाउनुपर्ने उनको धारणा थियो । यसको मुख्य कारण पत्ता लगाई समाधानका लागि पहल गर्दै महिलालाई उद्यमशील र सिर्जनशील बनाउनु आजको आवश्यकता भएको उनले बताए ।

कार्यक्रममा नेपाल पत्रकार महासंघ कास्की अध्यक्ष विमला भण्डारीले मिडिया र सरोकारावालासँगै सरकारी पक्ष महिला हिंसा अन्त्यका लागि हातेमालो गर्नुपर्ने बताइन् । समाज परिवर्तन हुँदै गएको अवस्थामा हामी पनि परिवर्तन हुन आवश्यक रहेको उनको भनाइ थियो । कार्यक्रममा सरिता दाहाल र प्रहरी उपरीक्षक खड्कबहादुर खत्रीले महिला हिंसाका पछिल्लो अवस्थाका बारेमा प्रस्तुतिकरण राखेका थिए ।