पोखरा । आम निर्वाचनमा प्रदेश सभातर्फ गण्डकीमा ठूलो दल भएकाले आफ्नै नेतृत्वमा सरकार बनाउन पहल थालिएको छ । नेपाली कांग्रेस गण्डकी प्रदेशको आइतबार बसेको पदाधिकारी बैठकले प्रदेशमा नेपाली कांग्रेसलाई ठूलो पार्टी बनाउने ५ दलीय गठबन्धन भएकोले कांग्रेसकै नेतृत्वमा सरकार गठन गर्नको लागि आवश्यक पहल र छलफल गर्ने निर्णय गरेको छ ।

आम निर्वाचनमा गण्डकी प्रदेशबाट ५ दलीय गठबन्धनबाट उम्मेदवार भएका १८ संघीय सांसदका उम्मेदवारमध्ये १३ जना संघीय सांसद विजयी भएका छन् । तीमध्ये १० जना नेपाली कांग्रेसले जितेको छ । गण्डकी प्रदेश सभा सदस्य ३६ मध्ये गठबन्धनबाट २३ सदस्यलाई विजयी भएका छन् । तीमध्ये १८ प्रदेश सदस्य नेपाली कांग्रेसले जितेको छ ।

प्रदेशका प्रवक्ता माधवप्रसाद बास्तोला (मधु)ले गठबन्धनका तर्फबाट केन्द्रमा नेपाली कांग्रेसको नेतृत्वमा केन्द्रीय सरकार र यस गण्डकी प्रदेशमा पनि गठबन्धनका तर्फबाट नेपाली कांग्रेसको नेतृत्वमा प्रदेश सरकार बनाउन पहल गर्ने निर्णय गरिएको बताए ।

नेपाली कांग्रेस गण्डकी प्रदेशका सभापति शुक्रराज शर्माको अध्यक्षतामा बसेको बैठकले निर्वाचनमा सहयोगीहरुलाई धन्यवाद् ज्ञापन गरेको छ । यही मंसिर ४ गते भएको आम निर्वाचन शान्तिपूर्ण तरिकाले गराउन सहयोग गर्ने निर्वाचन आयोग, सम्पूर्ण मतदाता, ५ दलीय गठबन्धनका नेता तथा कार्यकर्ता, सम्पूर्ण सञ्चारकर्मी, सुरक्षाकर्मी तथा पर्यवेक्षक सबैलाई धन्यवाद व्यक्त गरेको बताए । साथै निर्वाचनले संवैधानिक, लोकतान्त्रिक पद्धतिको निर्माणमा सहयोग पुर्‍याएको अनुभूति भएको उनले बताए ।