पोखरा । पर्यटकीय तथा धार्मिक क्षेत्र घार्मीमा बालाचतुर्दशी पर्व मनाइने भएको छ । मंसिर ६ गते बालाचतुर्दशी अवसरमा घार्मीस्थित ओमकारेश्वर मन्दिर परिसरमा सद्विज छर्नुका साथै विविध कार्यक्रम गरी पर्व मनाउन लागिएको मन्दिर व्यवस्थापन समिति नन्दराज दाहालले बताए ।

सोको लागि मन्दिर परिसरमा सरसफाइ गर्नुका साथै रंगरोगन गर्ने कार्य समेत गरिएको छ । मन्दिर रंगरोगनका लागि इन्द्रेणी हार्डवेयरका खगेन्द्र थापाले सहयोग गरेका छन् ।

पितृ उद्धारका लागि त्यस क्षेत्रमा सद्बिज छर्न कुरेचौर हरिपाउ, पुरून्चौर, हेमजा, लामाचौर, बाटुलेचौर लगायत आसपासका क्षेत्रबाट भक्तजन त्यहाँ पुग्ने गरेका छन् । स्थानीयवासीको घरबाट फूलको डोली निकाली बाजागाजासहित विधिपूर्वक सद्विज छर्ने चलन छ ।

गएको २ दशकदेखि सो मन्दिरमा विधिपूर्वक सदविज छर्ने र पर्वलाई मनाउँदै आइएको समितिले जनाएको छ ।