हेमजा । नेपाल रेडक्रस सोसाइटी अन्नपूर्ण गापा १,२,३ उपशाखा ढिकुरपोखरीले रेडक्रस परिचयात्मक कार्यक्रम तथा विपद् व्यवस्थापनसम्बन्धी प्रशिक्षण गरेको छ ।

कार्यक्रममा उपशाखाभित्रका बालमन्दिर मावि, धारापानी मावि, अन्नपूर्ण बहुप्राविधिक शिक्षालय, माछापुच्छ्रे मावि, मर्निङस्टार मावि र सिर्जना मावि गरी कुल ६ युवा तथा रेडक्रस सर्कलका पदाधिकारी, शिक्षक नायक तथा जनप्रतिनिधि सहभागी थिए ।

अन्नपूर्ण गापा अध्यक्ष विष्णुबहादुर केसीले विपद् जुनबेला पनि आउन सक्ने बताउँदै विपद् वा समस्यामा परेका मानिसलाई सहयोग गर्नु नै मानव धर्म हुने उल्लेख गरे । उनले प्रशिक्षणसँगै विपद् जोखिम न्यूनीकरणमा सहयोग पुग्ने विश्वाससमेत लिए ।

रेडक्रस जिल्ला उपसभापति डण्डराज शर्मा, उपकोषाध्यक्ष तथा गण्डकी प्रज्ञा परिषद् सदस्य कृष्णप्रसाद पौडेल, अन्नपूर्ण १ का सदस्य नरपति भण्डारी, अन्नपूर्ण २ का अध्यक्ष पिताम्बर भण्डारी, ३ का अध्यक्ष फणीन्द्रप्रसाद पौडेल, माछापुच्छ्रे युरेसका शिक्षक नायक तारापति भण्डारी लगायतले बोलेका थिए ।

उपशाखा सभापति नारायणप्रसाद भण्डारीले उपशाखाले विपद् व्यवस्थापन तथा राहत कोष स्थापना गर्न लागेको जानकारी दिर्दै कोषमा सहयोग गर्न अनुरोध गरे । अनुरोध लगत्तै परमेश्वरी सुवेदीबाट १ हजार ५०, बालिका सुवेदीबाट १ हजार, दिल जिसीबाट १ हजार तथा युरेस बालमन्दिरबाट ५ सय रुपैयाँ कोषका लागि हस्तान्तरण पनि गरियो ।

उपशाखा सभापति भण्डारीको अध्यक्षतामा भएको कार्यक्रममा माया अधिकारीले स्वागत र उपसचिव दिल जिसीले संचालन गरेका थिए ।