पोखरा । एसइई–२०७८ को नतिजामा कास्कीमा सर्वोत्कृष्ट नतिजा हासिल गरेको डिज्नील्याण्ड एकेडेमीले सोमबार विद्यार्थीको सम्मान गरेको छ ।

विद्यालयकी छात्रा रितिका पोखरेलले उच्च श्रेणीअन्तर्गत ४ जिपिए (जिल्लामा छात्रातर्फ एकमात्र) ल्याउन सफल भएकी थिइन् । समारोहमा उत्कृष्ट नतिजा ल्याउने विद्यार्थीहरुलाई नगद र दोसल्लासहित सम्मान गरिएको थियो ।

पोखरा–७, मासबारस्थित विद्यालयले २०६३ सालमा पहिलो पटक एसएलसी (हाल एसइई) मा आफ्ना विद्यार्थी सम्मिलित गराएकोमा यस पटक १० औं ब्याच थियो । डिज्नील्याण्डबाट २८ परीक्षार्थी सम्मिलित भएकोमा ३.६ माथि ल्याउने ७ जना, ३.२ देखि ३.६ जिपिए ल्याउने ११ जना, २.८ देखि ३.२ जिपिए ल्याउने ९ जना र २.४ देखि २.८ जिपिए ल्याउने १ जना छन् ।

विद्यालय व्यवस्थापन समिति अध्यक्ष विश्वेश्वर पराजुलीको अध्यक्षतामा भभएको कार्यक्रममा रितिकाले सफलताको श्रेय विद्यार्थीको लगनशीलता, अनुशासन र मिहिनतमा निर्भर हुने बताइन् । कार्यक्रममा विद्यालयका प्राचार्य नरेशप्रसाद बरालले उत्कृष्ट नतिजा सहित सफलता प्राप्त गरेका सम्पूर्ण विद्यार्थीहरुलाई शुभकामना ब्यक्त गरेका थिए । विद्यालयले पढाइका अलावा अतिरिक्त क्रियाकलापमा समेत उत्कृष्ट नतिजा हासिल गर्दै आएको प्राचार्य बरालले बताए ।

कार्यक्रमको संचालन विद्यालयका अतिरिक्त क्रियाकलाप विभाग प्रमुख एवं कम्प्युटर विभाग प्रमुख प्रेम गिरीले गरेका थिए ।

यसपालि नेपालभरबाट ४२ विद्यार्थीले ४ जिपिए ल्याएकोमा कास्कीमा रितिकासहित २ जना विद्यार्थीले ४ जिपिए ल्याएका हुन् । अर्का विद्यार्थी लुम्लेस्थित बालमन्दिर माविबाट परीक्षामा सम्मिलित पर्वतका अभिषेक न्यौपाने हुन् ।