पाेखरा । नेपाली कांग्रेसका केन्द्रीय सदस्य प्रदीप पौडेलले पोखरा वडा १२ को विकासको लागि आफू हरतरहले लाग्ने बताएका छन् । नेपाली कांग्रेस वडा १२ कमिटीले हालै आयोजना गरेको कार्यक्रमलाई सम्बोधन गर्दै पौडेलले भने, ‘पोखरा १२ को विकासको जिम्मा मेरो पनि हो भन्ने सम्झनुहोला।’

उक्त वडामा कांग्रेसलाई जिताउन जरुरी भएको भन्दै नेता पौडेलले जीतले नै वडाको विकासमा सहयोग पुग्ने र बजेट व्यवस्थाका लागि केन्द्रिय तहबाटै आफूले पहलकदमी लिने आश्वासन दिए । पोखरा १२ मा कांग्रेसलाई जिताएर पठाए केन्द्रबाट बजेट पार्न आफ्नो पूर्ण पहल रहने उनले बताए । अहिलेको चुनाव स्थानीय तहको भए पनि यसको केन्द्रीय महत्वसमेत भएको भनाइ उनको थियो । यो पटकको चुनावको हारजीतले संघीय चुनावको नतिजामा प्रभाव पर्न सक्ने उनले सुनाए।

सो अवसरमा पौडेलले वडा १२ मा नेपाली काँग्रेसको तर्फबाट वडा अध्यक्षका प्रत्यासी सन्तोष बास्तोलालाई विजयी गराउन मतदातासँग आव्हान गरे । कानुन, संचार तथा प्रदेशसभा मामिला मन्त्री विन्दुकुमार थापाले पनि सो अवसरमा भनाइ राखेका थिए । कार्यक्रमको अध्यक्षता रामजी बास्तोलाले गरेका थिए।