पोखरा । पोखरा महानगरपालिकाले चुनावको मुखमा करिब १४ सय विपन्न परिवारलाई नगद सहयोग गर्ने गरी सूचना निकालेको छ । यसअघि नै फाराम भरेर संकलन गरिएको १ हजार ३ सय ४६ जनाको नाममा अहिले दाबी विरोधका लागि वडामा पठाइएको हो । चुनावअघि मत प्रभावित हुने गरी कुनै कार्यक्रम गर्न नहुने चुनावी आचारसंहिता भए पनि महानगरले त्यसकोसमेत ख्याल नगरी सूचना निकालेको हो । त्यतिमात्रै होइन, विपन्न छात्रवृत्तिको सूचनासमेत अहिले नै निकालिएको छ । दाबी विरोधका लागि सूचना निकालिएको र लाभग्राहीले वडामा खोलेको खातामै पैसा जम्मा गरिदिन लागिएको हो । पोखरा महानगरपालिकाले वैशाख ९ गते कोभिड–१९ महामारीबाट प्रभावित अतिविपन्न परिवार हस्तान्तरण रकम प्राप्त गर्ने लाभग्राहीको दाबी विरोधसम्बन्धी सूचना निकालेको हो ।

यसकै आधारमा अहिले वडा–वडामा नगद पाउने नागरिकहरुले बैंक खाता खोल्न थालेका छन् । सूचनाअनुसार एक परिवारले १० हजारका दरले नगद पाउने छन् । चुनावले गर्मिएको पोखरामा महानगरको यो निर्णयले मत प्रभावित हुन सक्ने भन्दै विरोध गरिएको छ । महानगरले एउटै वडामा आधाभन्दा बढी रकम बाँड्न लागेको छ । वडा नम्बर १३ मा मात्रै ७ सय १३ जनाको नाम पठाइएको छ । अधिकांश एमालेले जितेका वडाबाट लाभग्राही छनोट गरिएको छ । वडा नम्बर १५ मा १ सय ६६ जना, १९ मा ८४ जना, १७ मा ६४ जना, १६ मा ६० जना, २२ मा ७९ जनाको नाम छ । यस्तै, वडा २८ मा ४४ जना, २४ का २०, २९ का २३ जना, २१ मा ९ जना, ८ का २ जना र २५ मा १ जनाले रकम पाउँदै छन् ।

कांग्रेसले जितेका केही वडा पनि समेटिएका छन् । तर लाभग्राही निकै कम छन् । सबैभन्दा धेरै लाभग्राही वडा १२ मा ३२ जना छन् भने २ मा १७ जना, ९ का १४ जना, ३ र १० का ५/५ जना तथा ३२ को १ जनाले रकम पाउने छन् । अहिले लाभग्राहीका सूची प्रकाशन गरिएको र दाबी विरोध परेमा अझै छानविन हुने महानगरले जनाएको छ । अहिले एनआइसी एसिया बैंकका शाखाहरुमा लाभग्राहीको खाता खोल्ने भिड छ । वडा १३ का अध्यक्ष लेखबहादुर तामाङ (दर्शन लामा) ले नियमित काम गर्दा विरोध गर्नुपर्ने आवश्यकता नरहेको बताए ।

महानगरले साढे १३ सय परिवारलाई १० हजार दरले रकम बाँड्न लागेको हो

‘यो कार्यक्रम संघ सरकारको हो । हामीले महानगरको खाताबाट बाँड्न लागेको होइन,’ उनले भने, ‘काम गर्दै जाँदा चुनावको नजिक पुग्यो होला । तर चुनावकै लागि बाँड्न लागेका होइनौं ।’ लाभग्राही भएका वडामा अहिले बैंकका कर्मचारी पुगेर खाता खोल्न थालेका छन् । कांग्रेस कास्कीले यसबारे मुख्य निर्वाचन अधिकृतको कार्यालयलाई जानकारी गराइसकेको जनाएको छ । वास्तविक पीडितले सहयोग पाउनुपर्ने भएपनि अहिले उपयुक्त समय नभएको कांग्रेस कास्की सभापति किशोरदत्त बरालले बताए । ‘पीडितले पाउनुपर्छ । हामी त्यसमा विरोध गर्दैनौं । अहिलेसम्म गरेका पनि थिएनौं तर चुनाव सकिएपछि गर्दा राम्रो हुन्छ,’ उनले भने, ‘अहिले नै दावी विरोधको सूचना निकाल्ने र बैंक खाता खोल्न लगाउँदा यसले राम्रो सन्देश गएन ।’

वडाले ९ महिनाअघि फाराम भरेर पठाएका थिए । अहिलेसम्म चुपचाप बसेर चुनावकै अगाडि प्रक्रिया अघि बढाउनु गलत हुने बराल बताउँछन् । महानगरका सूचना अधिकारी भरतराज पौडेलले नगद बाँड्ने कुरामा चुनावी आकांक्षा नजोडिएको दाबी गरे । ‘अहिले नै पैसा बाँडिहाल्ने होइन, हामीले खाता खोलेर माथि पठाउनुपर्छ । ढिलो हुने भएपछि सुरु गरेका हौं,’ उनले भने, ‘खासै समस्या त होइन तर विरोध आएपछि हामी सल्लाह गर्छौं । अनि निर्णय लिएर प्रक्रिया अघि बढ्छ ।’ समयमा खर्च हुन नसके रकम फ्रिज हुने र माथि नै फर्किने पौडेलले जानकारी दिए ।

कार्यक्रमका संयोजक विष्णु दाहालले विरोध भएका कारण कार्यक्रम पछि सार्नुपर्ने बताए । रकम वितरणको लागि तयारी अवस्थामा रहे पनि चुनावका कारण विरोध भएको भन्दै उनले मतदानको समयपछि मात्रै प्रक्रिया अघि बढाउन पहल गर्ने बताए । पोखराबाट ३ हजार ७ सय २४ परिवार छनोट भएका थिए । तीमध्ये १ हजार ३ सय ४६ को मात्रै आवेदन परेको महानगरले जनाएको छ । लाभग्राहीको छनोट गर्न उपमेयरको संयोजकत्वमा समिति गठन भएको छ । अहिले उपमेयर नभए पनि कार्यक्रम भने रोकिएको छैन ।