पोखरा । एन प्याब्सन कास्कीको आयोजनामा स्तरीकृत प्रश्नपत्र निर्माणसम्बन्धी कार्यशाला गोष्ठी समापन भएको छ ।
राष्ट्रिय परीक्षा बोर्ड परीक्षा व्यवस्थापन कार्यालय गण्डकी प्रदेश, पोखराको समन्वयमा भएको गोष्ठी एन प्याब्सनमा आबद्ध विद्यालयका अंग्रेजी, गणित र विज्ञान विषयका शिक्षक गरी १ सय २० जना सहभागी भएको एनप्याब्सन परीक्षा उपसमितिका कार्यवाहक संयोजक सञ्जय पौडेलले जानकारी दिए । गोष्ठीको सहजीकरण डा.वेदप्रसाद ढकाल, रमेश भट्टराई, शान्ताराम लामिछाने र बामदेव पौडेलले गरेका थिए ।
कार्यक्रममा राष्ट्रिय परीक्षा बोर्ड गण्डकी प्रदेशका प्रमुख विष्णुनारायण श्रेष्ठ र एनप्याब्सन कास्कीका अध्यक्ष हेमन्त अधिकारीले कार्यशाला गोष्ठीमा सहभागीलाई प्रमाणपत्र वितरण गरेका थिए ।
राष्ट्रिय परीक्षा बोर्ड गण्डकी प्रदेशका प्रमुख श्रेष्ठले कार्यशालाले आगामी दिनमा हुने परीक्षा प्रणाली अझै स्तरीय हुने विश्वास व्यक्त गरे ।
एनप्याब्सन कास्कीका अध्यक्ष हेमन्त अधिकारीको अध्यक्षतामा भएको कार्यक्रममा सदस्य शिवराज पौडेल, प्रशिक्षक डा.वेदप्रसाद ढकाल, गोष्ठीमा सहभागीको तर्फबाट हिलसाइड बोर्डिङ स्कुलकी आरती सुवेदी, रत्नज्योति माविकी जमुना अधिकारी, अल्फा एकेडेमीका कृष्णप्रसाद धितालले बोलेका थिए । गोष्ठी दुई दिनसम्म चलेको थियो ।