पोखरा । गण्डकी प्रदेशसभामा प्रस्तुत आगामी बजेटका सिद्धान्त र प्राथमिकताबारे छलफल बिहीबार सकिएको छ । ३ दिनसम्म चलेको छलफलपछि बिहीबार नै अर्थमन्त्री किरण गुरुङले जवाफ दिएका छन् ।
एजेन्डा बजेट भए पनि सांसदहरुले कार्यसूची छोडेर सत्ता जोडघटाउको अभिव्यक्तिमै केन्द्रित रहे । सरकारले विश्वासको मत नलिएको भन्दै विपक्षीहरु बजेटको सिद्धान्त र प्राथमिकतामाथि छलफल गर्न मानेनन् । सत्तापक्ष सभामुखमाथी खनिए । विपक्षीहरु प्रदेशप्रमुख र मुख्यमन्त्रीमाथि खनिए । दुवै पक्षले एक अर्कालाई नैतिकताको पाठ पढाइरहे ।
सभामुख माओवादी पृष्ठभूमिका हुन् भने प्रदेश प्रमुख र मुख्यमन्त्री एमाले निकटका छन् । सभामुख र प्रदेश प्रमुख स्वतन्त्र पद हो । त्यसो त, मुख्यमन्त्रीमा नियुक्त भए पछि पनि दलीयभन्दा जनहितको पक्षमा काम गर्नुपर्छ । तथापि पार्टीको जिम्मेवारीबाट हट्नु पर्दैन । बिहीबारको छलफल सुरु हुने बित्तिकै सत्तारुढ सांसदहरु (मन्त्री समेत) उठेर सदन अवरुद्ध गरे । उनीहरुले बुधबारको छलफलमा एमाले सांसद मनबहादुर गुरुङको मन्तव्य सभामुखले रेकर्डबाट हटाएकोमा आपत्ति जनाए । गुरुङले कार्य व्यवस्था परामर्श समितिका पदाधिकारी र सदस्यको राजीनामा मागेका थिए । समितिको अध्यक्षता सभामुखले गर्छन् ।
प्रदेशसभा नियमावली अनुसार सभामुखको आचरण विरुद्ध छलफल हुनुभन्दा अरु समयमा बोल्न र प्रतिक्रिया दिन मिल्दैन । नियमावली विरुद्ध गुरुङले बोलेको भन्दै सभामुखले रेकर्डबाटै आवाज हटाइदिन निर्देशन दिएका हुन् । बिहीबार एमाले प्रमुख सचेतक मायानाथ अधिकारीले सभामुखको निर्णय सच्याउन माग गरे । ‘लोकतन्त्रमा बोल्न पाइन्छ । प्रदेश प्रमुख र राष्ट्रपति विरुद्ध संसदमा भएका अराजक अभिव्यक्तिहरु नैतिकताको कसीमा जाँच्नुपर्ने होईन र ?,’ उनले भने, ‘गुरुङको अभिव्यक्ति व्यक्ति र पदप्रति थिएन । कानुनी नभई राजनीतिक विषय उठाउनु भएको हो । ती कुरा रेकर्डबाट हटाउनुपर्ने आवश्यक छ ? सभामुखको निर्णय सच्याउन अनुरोध गर्दछु ।’
सत्तारुढ सांसद रोशन गाहा थापाले गुरुङको अभिव्यक्ति नियमावली विपरीत नभएकोले सभामुखको कदम लोकतन्त्रविरुद्ध भएको बताए । ‘हातमा कानुन लिएकोजस्तो मलाई लाग्दैन । कसैको मानमर्दन गरेकोजस्तो मलाई लाग्दैन,’ उनले भने, ‘कसैलाई मानहानी नगरिकन जनप्रतिनिधि बोलिरहँदा रुलिङ भएर रेकर्डबाट हटाउनु कुन लोकतन्त्र हो ? जवाफ चाहियो ।’
सांसद इन्द्रधारा विष्टले विपक्षीहरु आगो र एमालेलाई पानीसँग दाँजेर घमण्ड नगर्न विपक्षीलाई चेतावनी दिए । ‘लोकतन्त्र र समृद्धिका लागि दृष्टिकोण मिल्नेहरु एक ठाउँमा हुनुपर्छ भनेर धेरै पटक भन्नुभयो । यसको संरक्षण कसले गर्छ जनताले हेरिरहेका छन्,’ उनले भने, ‘दृष्टिकोण भनेको कम्फरटेबल भन्नुभएको होला । अब पनि कुनै भ्रम छ र ? तपाईंहरुको कम्फरटेबल इगो, झण्डा र कुर्चीको लागि मात्रै नहोस्, संघीयताका लागि होस् । राष्ट्र र राष्ट्रियताका निम्ति होस् ।’
सांसद इन्द्रलाल सापकोटाले सर्वदलीय सरकार गठनको आह्वान गरे । कुनै पक्षसँग पनि बलियो बहुमत नभएकोले सरकारको दीर्घायु नरहेको भन्दै उनले प्रदेशको समृद्धिका लागि संवादबाट समस्याको हल निकाल्न आग्रह गरेका हुन् । ‘बजेटको प्रतीक्षा गर्नुपर्नेमा संसद जोड घटाउमा व्यस्त छ । संसदभित्रको गणितलाई हेर्दा संख्या केही तलमाथि हो । सरकारको टिकाउ कसैसँग पनि छैन,’ उनले भने, ‘एक पटक सोचौं त, संविधानको संरक्षण कसले गर्ने हो ? बहुत ठूलो चुनौती खडा भएको छ । हामी एक पटक सबै राजनीतिक दलहरु धर्तीमा टेकेर प्रदेश सम्हाल्न सार्थक संवादको आवश्यकता छ ।’ उनले सरकारका सिद्धान्त र प्राथमिकता नागरिकको हितमा आउन नसकेको टिप्पणि गरे ।
बजेटका बारेमा बोल्न भनिए पनि सत्तापक्ष र विपक्षी आरोप/ प्रत्यारोपमै बढी केन्द्रित रहे ।
माओवादी सांसद दीपक कोइरालाले प्रदेश प्रमुखको भूमिकाबारे प्रश्न उठाए । ‘१७६ (२) सम्झिऔं । कुनै दलको स्पष्ट बहुमत नभए २ वा २ दलको समर्थन भनेपछि ४ दलको पत्र बुझाईसकेपछि मुख्यमन्त्री बनाईंदैन भने प्रदेश प्रमुखको बारेमा यहाँ होइन, कुनै दिन विरोध गरे वापत जति सजायँ भोग्न परेपनि बोल्न छोडिँदैन,’ उनले भने, ‘लोकतन्त्र र जनताको पक्षमा बोलिन्छ । अल्पमत र बहुमतको कुरा धेरै उठ्यो । १ पटक टाउको गनौं न मन्त्री ज्यूहरुको पछि बस्ने सांसदको संख्या कति हो ? प्रतिपक्षी सांसदको संख्या कति हो ? मैले गणित बुझिन कि ? के हो बहुमत भनेको ?’ उनले सत्तारुढ दलले संविधान नमानेको आरोप तेस्र्याए । ‘जे भए पनि सत्तामा बस्नुपर्छ । मवाहेक पृथ्वी घुम्दैन । संख्या नपुगे पनि बहुमत मेरै हो । लोकतन्त्र पनि मै हो, गणतन्त्र पनि मै हो । नैतिकता पनि मेरो मात्रै छ । अरु सबै प्रजाहरु हुन् भन्ने मनोदशा व्याप्त छ,’ कोइराला भन्छन्, ‘सिद्धान्त र प्राथमिकता प्रस्तुत गर्नुअघि विश्वासको मत लिनुपर्छ भन्दा मन्त्री ज्यूहरुले नै जवाफ दिनुभयो । अहंकार पैदा गर्नुभयो ।’ उनले कांग्रेस संसदीय दलका नेता कृष्णचन्द्र नेपाली पोखरेललाई नै मुख्यमन्त्री मानेर सर्वदलीय सरकार बनाउन सुझाव दिए ।
जसपा सांसद हरिशरण आचार्यले सरकार कुर्सी जोगाउने खेलमा मात्रै व्यस्त भएको बताए । ‘बिरामी परेका जनताको उपचारका लागि छलफल चलेको छैन । कुर्ची कसरी बचाउने भन्ने मात्रै छलफल भएको छ । हामीले के सल्लाह र सुझाव दिने ?,’ उनले भने, ‘२ तिहाइको वामपन्थी सरकार हुँदा हामी त्यतातिर आँखा लगाउन पनि सक्दैन थ्यौं । त्यो कसले बनायो ? वामपन्थीको झण्डा बोक्ने र अयोध्यामा राम मन्दिर बनाएर रामपन्थी बन्ने ?’ सांसद दीपक चर्तिमगरले सरकारसँग बजेटको सिद्धान्त र प्राथमिकता पेस गर्ने विश्वास नरहेको बताए ।
जनमोर्चाकी सांसद पियारी थापा सरकार अल्पमतमा परेकोले विश्वासको मत लिएर नियमित काम गर्न सुझाव दिइन् । ‘सरकारले विश्वासको मत नलिइ यो सिद्धान्त र प्राथमिकता ल्याइएको छ । यसमा कुनै सुझाव दिनुपर्छ जस्तो मलाई लाग्दैन,’ उनले भनिन्, ‘सरकार आफ्नै भविष्यको ज्ञारेन्टी छैन । जनताको भविष्यको ज्ञारेन्टी कसरी गरोस् ?’ उनले मुख्यमन्त्रीले जनमोर्चाका सांसदलाई कित्ता छुट्याएर सत्ता बचाउमा लागेको आरोप लगाइन् । ‘मुख्यमन्त्री ज्यू सत्ता बचाउको अंकगणितमा खेलिरहनु भएको छ । अरु बारे नकारात्मक भ्रम सिर्जना गरेर सत्ताको रोटी सेक्दै हुनुहुन्छ । त्यो म्यान्डेट कहाँबाट पाउनुभयो ?,’ उनी भन्छिन्, ‘संसद विघटनको हवला दिँदै हिड्ने, अध्यादेशबाट बजेट ल्याउने धम्की दिने काम आफैमा खेदजनक छ । हाम्रा पार्टीको सांसदको विरुद्धमा भ्रम सिर्जना भएको छ । जनमोर्चा स्वतन्त्र पार्टी हो भन्ने हेक्का होस् ।’
माओवादी संसदीय दलका नेता हरिबहादुर चुमानले प्रदेश पनि संसद विघटनको बाटोमा लागेको तर्क गरे । ‘यो सरकारको विषयमा म केही भन्दिनँ । किनकि प्रदेश सरकार पनि संघ सरकारकै बाटोमा हिडेको छ,’ उनले भने, ‘गलत बाटोबाट बजेट पस्किन खोजेको छ । त्यो अधिकार छैन । अधिकार सम्पन्न भएर आओस् ।’ प्रदेशका मन्त्रीहरुले सरकारले विश्वासको मत नपाए संसद विघटन गर्ने र अध्यादेशबाट बजेट ल्याउने अभिव्यक्ति दिइरहेका छन् । बिहीबारको बैठकमा कांग्रेस सांसदहरु सहभागी भएनन् । सांसद चिन्ताबहादुर घले र भागवत प्रकाश मल्लले नाम टिपाएर पनि नबोल्ने भन्दै काटेका हुन् ।
Related News
सम्बन्धित समाचार
त्रासैत्रासमा तंग्रिदै कागबेनी
१३ वटा मुद्दा चलेका एक युवा पोखराबाट अटोमेटिक पेस्तोलसहित पक्राउ
कतारी अमिर स्वेदश फिर्ता : पोखरा–कतार उडान माग
मानवअधिकार आयोगसमक्ष द्वन्द्वपीडित समुदायको ज्ञापन
कास्कीमा एसइई उत्तरपुस्तिका परीक्षण रोकियो
hero news full width
मुख्य समाचार
मनिपालमा अत्याधुनिक एमआरआई मेसिन
गण्डकीमा डायलाइसिसका लागि अब पालो कुर्न नपर्ने
वैशाख १२, २०८१स्वदेश फर्किए कतारी अमिर
वैशाख १२, २०८१कतारका अमिरको भ्रमणसम्बन्धी खबर प्राथमिकतामा, विपिनको रिहाइ ‘मुख्य विषय’
वैशाख १२, २०८१रोजगार खोज्दै मेलामा
वैशाख १२, २०८१कतारी अमिरलाई ‘रुद्रकली’ र ‘खगेन्द्रप्रसाद’ !
वैशाख ११, २०८१