पोखरा । गण्डकी प्रदेशसभाका विपक्षी सांसदहरूले विनियोजन विधेयकको सिद्धान्त र प्राथमिकतामा माथिको छलफलमा सहभागी भए पनि त्यसमाथि धारणा राख्न अस्वीकार गरेका छन् ।
मंगलबारदेखि छलफल प्रारम्भ भएको छलफलमा विपक्षी दल कांग्रेस र माओवादीका सांसदले धारणा राख्न नमानेका हुन् । विश्वासको मत नलिएको सरकारले ल्याएको विधेयक भन्दै उनीहरुले कुनै धारणा नराखी कोरोना नियन्त्रणका विषयमा मात्र बोलेका थिए ।
कांग्रेसका मुख्यसचेतक मणिभद्र शर्माले विश्वासको मत नलिई बजेटको विषयमा प्रवेश नगरेको भए राम्रो हुने धारणा राखे । अहिलेका मुख्यमन्त्रीले विश्वासको मत पाएमा हिजोका दिनमा जस्तै रचानात्मक सुझाव दिन तयार रहेको उनको भनाइ थियो । प्रदेश प्रमुख आउँदा आउँदै बाटो बिराएको आरोप लगाए ।
छलफलका लागि रोस्टममा पुगेका कांग्रेस सांसद प्रकाशचन्द्र दवाडीले विश्वासको मत नलिएको सरकारले सिद्धान्त र प्राथमिकता प्रस्तुत गर्नु सान्दर्भिक नभएको बताए । ‘आफैं अल्पमतमा भएको सरकारले सदन त चलाएको छ, तर कसरी ?’ उनले भने, ‘जनता यतिबेला खुसी छैनन्, पीडामा छन्, जनताको खुसीका लागि सहकार्य गर्न तयार छौं ।’ यसैगरी सांसद बिन्दुकुमार थापाले अघिल्लो वर्षको बजेटको सिद्धान्त र प्राथमिकता प्रस्तुत गर्दाजस्तो अर्थमन्त्री किरण गुरुङमा अहिले जोश नभएको बताएका छन् । अघिल्लो वर्षका योजनाहरु गौण भएर पनि यस्तो अवस्था हुन सक्ने धारणा उनको छ । पहिलो काम सरकारको विश्वासको मत लिने र त्यसपछि मात्र प्रक्रिया अगाडि बढाउनुपर्नेमा अध्यादेशमार्फत ल्याउन खोजिएको बजेटको कुनै तुक नहुने उनले बताए ।
विश्वासको मत नलिएको सरकारले सिद्धान्त र प्राथमिकता प्रस्तुत गर्नु सान्दर्भिक नभएको जिकीर
कांग्रेस सांसद ललितकला गुरुङले पनि कुनै विचार नराखी विश्वासको मत लिनुपर्ने धारणा राखिन् । ‘विश्वासको मत लिनुपर्छ भन्ने सकारकालाई थाहा नै छ,’ उनले भनिन्, ‘विश्वासको मत लिन ३० दिन नै कुर्न पर्छ र ?’ सांसद सरीता गुरुङ पनि रोस्टम पुगेर सरकार अल्पमत र असंवैधानिक छ भन्दा भन्दै समय बर्बाद गरेको आरोप लगाइन् । विश्वासको मत लिन सके मुख्यमन्त्री जो भए पनि जनताको पक्षमा सही बजेट आउने उनको धारणा थियो ।
अर्का सांसद मेखलाल श्रेष्ठले पनि सिद्धान्त र प्राथमिकताका विषयभन्दा बाहिर रहेका आफ्नो धारण राखे । उनले वर्तमान सरकारका प्रधानमन्त्री केपी शर्मा ओलीले काम गर्नको सट्टा आफूलाई सर्वेसर्वा ठानेर जे मन लाग्यो त्यही गरेको आरोप लगाए । उनले बहुमत प्राप्त नगर्दासम्म प्रदेश सरकारलाई कुनै पनि गतिविधि अगाडि नबढाउन आग्रह गरे ।
माओवादी सांसद रामजीप्रसाद बरालले कुनै पनि राज्य प्रणालीसँग मेल खाएन भने त्यो अर्थ प्रणालीको औचित्य नहुने बताए । ‘राज्यप्रणाली अनुसारको अर्थनीति छैन, समृद्ध खालको अर्थनीति बन्न सकेन,’ उनले भने, ‘एकपक्षीय अर्थनीतिको कुनै तुक छैन, नागरिकको सपना सपनामा मात्र सीमित भएको छ ।’ पहिलाको अभ्यासलाई निरन्तरता दिने कामात्र भएको उनको भनाइ छ । मुलुक ध्रुवीकरण भएको उनले बताए । केन्द्र सरकारको गैरजिम्मेवारको लाचार छायाँको रुपमा गण्डकी प्रदेश सरकारलाई उनले परिभाषित गरेका छन् । प्रदेश सरकार आफैं वैधानिक नभएका कारण विश्वासको मत लिएर वैधानिकताका साथ काम गर्न उनले सुझाव दिए ।
माओवादीकै सांसद आशा कोइरालाले संसदमा प्रश्न उठ्दा सरकार मौन बस्न नमिल्ने बताएकी छिन् । उनले जनतालाई सेवा दिन सरकारले काम गर्न आवश्यक रहेको उल्लेख गरिन् नैतिकता गुमेको अवस्थामा राज्य जवाफदेही हुनुपर्ने आवश्यकता औंल्याइन् । संवैधानिक व्यवस्था अनुरुप सरकारलाई अगाडि बढ्न उनले अनुरोध गरेकी छिन् । विश्वासको मत लिनतर्फ सरकारको ध्यान पुग्नुपर्ने भनाइ उनको छ ।
माओवादीकै सांसद एवं पूर्वमन्त्री लेखबहादुर थापाले प्रधानमन्त्री केपी शर्मा ओलीले राष्ट्रपतिलाई निजी सचिवालयजस्तो बनाएर अगाडि बढेको आरोप लगाए । प्रदेश सरकार पनि केन्द्र सरकारको पछि लागेर हिँडेको उनको धारणा छ । प्रदेश सरकारले विश्वासको मत लिएर गए साथ र सहयोग गर्ने उनले बताए ।
आफ्नो पार्टीको कारवाहीमा परेका जनमोर्चाका सांसद कृष्ण थापाले आफ्नो धारणा राख्ने क्रममा सांसद थापाले गण्डकी प्रदेशमा विपक्षी दलहरुले निर्दलीयताको अभ्यास गरिरहेको आरोप लगाए । उनले भने, ‘अहिले संघको संसद विघटन भएको छ । धेरै माननीय अदालत जानुभएको छ । ठिकै छ नि त आफ्नो हक हितका लागि अदालत जानु स्वाभाविक छ । तर गण्डकी प्रदेशमा फेरि आफू सत्तामा पुग्नका लागि, अर्को पक्षलाई हराउनका लागि फेरि निर्दलीयता माग्दै हुनुहुन्छ ।’ उनले आफूलाई हटाएर फेरि हामी सरकारमा पुग्छौं भनेर अहिले मिडियाबाजी गरिरहेको आरोप समेत लगाए ।
गण्डकी प्रदेश सरकारका सांसद मायानाथ अधिकारीले ‘सुखी नागरिक, समृद्ध प्रदेश’ लाई सिद्धान्त र प्राथमिकतामा जोड दिएको बताए । पुँजीगत खर्चलाई प्रभावकारी बनाउन उनको सुझाव थियो । प्रदेशले पनि खोपको व्यवस्थापन गर्न पाउने गरी केन्द्रसँग सहकार्य गरेर अगाडि बढ्नुपर्ने बताए । एमाले सांसद कृष्णबहादुर थापाले अहिलेको सरकार अल्पमत वा बहुमतमा छ भन्ने दिन नजिकिएको बताए । मुख्यमन्त्रीले विश्वासको मत लिने तयारी गरिरहेको उनले जानकारी दिए । ‘यो सदन सबै दलका माननीयहरु बसेर सल्लाह गरेर नै सदन चलाएका होइन र,’ उनले भने ।
एमाले सांसद धनञ्जय दवाडीले विपक्षीलाई विरोधका लागि मात्र विरोध नगर्न आग्रह गरेका छन् । केही नपाएपछि विरोध गर्ने प्रचलनबाट मुक्त हुनुपर्ने आजको आवश्यकता रहेको उनले बताए । लोकतान्त्रिक विकासको आवश्यकतामा सबैको ध्यान पुग्नुपर्ने तर्क उनको छ । एमालेकै सांसद राजीव पहारीले प्रदेश सरकारको विनियोजन विधेयक सिद्धान्त र प्राथामिकता अमृत रस जस्तो भएको बताएका छन् । पहारीले अरुमाथि औंला उठाउनुभन्दा पहिले आफूतिर हेर्न आग्रह गरेका छन् । सबै मिलेर कोभिड रोकथाममा लाग्नसमेत उनको अनुरोध छ । ‘खोपको उचित व्यवस्थापन गर्न, संघीयतालाई प्रदेश सरकारबाट बलियो बनाउनु, उत्पादनमुखी रोजगारी, फजुल खर्च व्यवस्थापन गर्ने, स्वास्थ्य शिक्षा क्षेत्रलाई प्राथमिकतामा राखेर बजेट ल्याउन खोजिएको छ,’ उनले भने ।
सांसदद्वय मीना गुरुङ र मीनबहादुर गुरुङले पनि आधुनिक बजेटको सिद्धान्त र प्राथकिमताको विषयमा सहमति जनाएका छन् । अप्ठेरो परिस्थितिमा अर्थमन्त्रीले निकै मेहनतका साथ विधेयक ल्याएको उनीहरुको जिकीर छ । छलफल बुधबार पनि चल्ने छ ।
Related News
सम्बन्धित समाचार
त्रासैत्रासमा तंग्रिदै कागबेनी
१३ वटा मुद्दा चलेका एक युवा पोखराबाट अटोमेटिक पेस्तोलसहित पक्राउ
कतारी अमिर स्वेदश फिर्ता : पोखरा–कतार उडान माग
मानवअधिकार आयोगसमक्ष द्वन्द्वपीडित समुदायको ज्ञापन
कास्कीमा एसइई उत्तरपुस्तिका परीक्षण रोकियो
hero news full width
मुख्य समाचार
मनिपालमा अत्याधुनिक एमआरआई मेसिन
गण्डकीमा डायलाइसिसका लागि अब पालो कुर्न नपर्ने
वैशाख १२, २०८१स्वदेश फर्किए कतारी अमिर
वैशाख १२, २०८१कतारका अमिरको भ्रमणसम्बन्धी खबर प्राथमिकतामा, विपिनको रिहाइ ‘मुख्य विषय’
वैशाख १२, २०८१रोजगार खोज्दै मेलामा
वैशाख १२, २०८१कतारी अमिरलाई ‘रुद्रकली’ र ‘खगेन्द्रप्रसाद’ !
वैशाख ११, २०८१