पोखरा । गण्डकी प्रदेश सभाको विशेष अधिवेशन सोमबारबाट अन्त्य भएको छ ।

मुख्यमन्त्री पृथ्वीसुब्बा गुरुङविरुद्ध दर्ता भएको अविश्वास प्रस्ताव अब औचित्यहीन भएपछि अधिवेशन अन्त्य भएको हो ।

मुख्यमन्त्री गुरुङविरुद्धको प्रस्तावमा विशेष अधिवेशनको सोमबारको बैठकमा मतदान हुने कार्यसूची थियो । तर त्यस अगावै आइतबार बेलुकापख उनले राजीनामा दिएका हुन् ।

संसद सचिवालयका अनुसार प्रदेश सभाको विशेष अधिवेशन सोमबार बिहान १० बजेदेखि अन्त्य भएको हो ।

यसका लागि प्रदेश प्रमुखको कार्यालयबाट आइतबार नै प्रदेश सभा सचिवालयमा पत्र गएको थियो ।

नेपाली कांग्रेस, माओवादी केन्द्र र जनता समाजवादी पार्टीका २८ सांसदले २ वैशाखमा मुख्यमन्त्री विरुद्ध अविश्वास प्रस्ताव संसद सचिवालयमा दर्ता गराएका थिए । सरकारकाे सिफारिसमा त्यस अगावै हिउँदै अधिवेशन वैशाख १ गते रातिदेखि अन्त्य भएको थियो ।

अविश्वास प्रस्तावका प्रस्तावकहरुले २ गते नै संसदको विशेष अधिवेशन माग गर्दै प्रदेश प्रमुखलाई निवेदन दिएका थिए ।

तत्कालीन प्रदेश प्रमुख अमिक शेरचनले १३ गतेबाट विशेष अधिवेशन सुरु हुने गरी ६ गते आह्वान गरेका थिए ।

त्यस अनुसार वैशाख १५ गते अविश्वास प्रस्तावमा मतदानकाे कार्यसूची थियाे । तर त्यसैदिन जनमाेर्चाका १ सांसद हराएपछि संसद बैठक राेकिएकाे थियाे ।