पोखरा । शैक्षिक परामर्शदाता कम्पनी हिमा–अस पोखरा एजुकेसन कन्सल्टेन्सीको आयोजनामा हिमा–अस कप फुटसल प्रतियोगिता हुने भएको छ । आगामी वैशाख ९ र १० गते पोखरा गणेशटोलस्थित ‘स्पोर्टस् क्यासल’मा प्रतियोगिता हुनेछ ।

कलेजस्तरीय हुने प्रतियोगिता कलेज र यूनिभर्सिटीसँग भाइचारा विकास गर्दै विद्यार्थीसँग सौहार्दपूर्ण सम्बन्ध विकास गर्ने उद्देश्यले आयाोजना गरिएको कम्पनीले जनाएको छ । हिमा–अस पोखराको तर्फबाट प्रतियोगिता संयोजक अर्जुन पाण्डेले भने,‘त्योबाहेक शिक्षासँगै खेलकुदको पनि प्रमोट गर्ने हाम्रो लक्ष्य हो ।’

संयोजक पाण्डेका अनुसार प्रतियोगितामा ३५ भन्दा बढी कलेज सहभागी हुने अनुमान छ । प्रतियोगितामा प्लस टुदेखि स्नातक तहसम्मका विद्यार्थी सहभागी हुन पाउनेछन् । प्रतियोगिताको विजेता टोलीले ५० हजार नगदसहित प्रमाणपत्र र मेडल प्राप्त गर्नेछ । उपविजेताले २५ हजार रुपैयाँ प्राप्त गर्ने कम्पनीले जनाएको छ ।

प्रतियोगितामा उत्कृष्ट खेलाडी र अनुशासित खेलाडी÷कलेज शीर्षकमा समेत पुरस्कार दिइने कम्पनीले जनाएको छ । प्रतियोगितामा सहभागी हुन चाहने समूहले न्यूरोड बुद्धमार्गस्थित कन्सल्टेन्सीको कार्यालयमा उपस्थित भई दर्ता गर्नुुपर्नेछ ।