पोखरा। युनाइटेड क्लब पोखराले मादीको ताङतिङस्थित हिमालय मिलन माविमा अध्ययनरत विद्यार्थीलाई न्यानो कपडा वितरण गरेको छ । क्लबको शिक्षा कार्यक्रम अन्तर्गत विद्यालयका ५३ जना विद्यार्थीलाई न्यानो कपडा वितरण गरिएको क्लब महासचिव शान्तबहादुर थापाले जानकारी दिए ।

मादी गाउँपालिकाका अध्यक्ष वेदबहादुर गुरुङ ‘श्याम’ ले क्लबले पोखरामा महोत्सवको आयोजना गरी बचत रकम सामाजिक सेवामा समर्पित गर्नुले क्लबको सामाजिक काममा गाउँपालिकाले साथ र सहयोग गर्ने प्रतिबद्धता ब्यक्त गरे ।

मादी वडा २ अध्यक्ष एक्काजंग गुरुङले विपन्न परिवारका विद्यार्थीलाई न्यानो कपडा वितरण गरेकामा वडाको तर्फबाट आभार प्रकट गरे ।

क्लबका संस्थापक अध्यक्ष हिमालय बख्रेलले गाउँ तथा दूरदराजमा रहेका विद्यालयमा अध्ययनरत विद्यार्थीलाई शैक्षिक सामग्रीसँगै न्यानो कपडा वितरण गर्ने कार्य क्लबले स्थापनाकालदेखि नै गर्दै आएको जानकारी दिए ।

हिमालय मिलन माविका प्रअ ओमप्रकाश गुरुङले क्लबको गुन बिर्सन नसकिने बताए ।

कार्यक्रममा क्लब अध्यक्ष राजु श्रेष्ठ, निवर्तमान अध्यक्ष तथा शैक्षिक कार्यक्रम संयोजक लालकाजी गुरुङले आगामी दिनमा ताङतिङ होम स्टे प्रवद्र्धनका लागि आउने महोत्सवमा स्टल निशुल्क उपलब्ध गराउने प्रतिबद्धता ब्यक्त गरे ।

क्लबले वर्षेनी अमरसिंह चौरमा पोखरा महोत्सवको आयोजना गर्दै शिक्षा, स्वास्थ्य, खेलकुद, पर्यटन प्रवद्र्धनका लागि चिडियाखाना निर्माणसँगै सेती नदी संरक्षण र प्राकृतिक विपदमा परेकाहरुलाई आर्थिक सहयोग गर्दै आएको छ । साथै क्लबले शिक्षा कार्यक्रम अन्तर्गत हरेक वर्ष विद्यालयमा पुगी विद्यार्थीलाई न्यानो कपडा हस्तान्तरण गर्दै आएको जनाएको छ ।