पोखरा । गण्डकी प्रदेशका सांसद राजीव गुरुङ (दीपक मनाङे)की पत्नी दिक्छेन लामा धरौटीमा छुटेकी छन् ।

मंसिर १० गते डाँकाचोरी मुद्दामा पक्राउ परेकी लामा थुनछेक बहसपछि शुक्रबार जिल्ला अदालतको आदेशबाट रिहा भएकी हुन् ।

जिल्ला अदालतका प्रमुख न्यायाधीश श्रीकृष्ण भट्टराईको इजलाशले उनलाई ५० हजार धरौटीमा छाड्न आदेश दिएको हो । फौजदारी कार्यविधि संहिता २०७४ अनुसार ५० हजार धरौटीमा रिहा गर्न आदेश भएको अदालतका स्रेस्तेदार रामप्रसाद पौडेलले बताए ।

पोखराको रक्षामार्गस्थित १ घरबाट बहुमूल्य धातु चोरी गरेको आरोप दिक्छेनमाथि छ । उनीविरुद्ध जिल्ला प्रहरी कार्यालय कास्कीमा मंसिर ४ मा जाहेरी परेको थियो ।
कात्तिक ८ गते २० लाख रुपैयाँ जतिका बहुमूल्य धातु र मूर्ति डाँकाचोरी गरेको आरोपसहित जाहेरी दर्ता भएको थियो ।

प्रहरी र अदालतसँगको बयानमा दिक्छेनले आफूले चोरी नगरेको बरु उल्टै पति दीपक मनाङेले फसाउन यो प्रपञ्च रचेको बताएकी छन् ।

रोनित गुरुङको कोठाबाट चाँदीका ७ वटा अंखोरा, बुद्धको मूर्तिसहित ६ वटा मुुर्ति चोरेको भन्दै परेको जाहेरी नै प्रतिशोधपूर्ण रहेको उनले बयान दिएकी छन् ।