शिक्षासेवी इ. लेखबहादुर गुरुङको निधन

Avatar आदर्श समाज सम्वाददाता
मंसिर ६, २०७७

पोखरा, ६ मंसिर । पोखराका शिक्षासेवी, सञ्चारउद्यमी एवं वातावरणविद् इ. लेखबहादुर गुरुङको शनिबार दिउँसो निधन भएको छ ।

पोखरा इन्जिनियरिङ कलेजका संस्थापक प्रिन्सिपल तथा हिमचुली एफएमका संस्थापक इ. गुरुङको काठमाडौंको ग्राण्डी अस्पतालमा उपचारक्रममा ६८ वर्षको उमेरमा निधन भएको हो ।

कलेज परिसरमै गत कात्तिक २५ गते एक्कासी ढलेपछि उनलाई मणिपाल शिक्षण हस्पिटलबाट काठमाडौं लगिएको थियो । उनको मस्तिष्क पक्षघातसँगै मिर्गौला समस्याबाट मृत्यु भएको परिवारजनले जनाएको छ ।

सफल शिक्षाविद्, समाजसेवी एवं कुशल प्राध्यापक इ. लेखबहादुरको जन्म २०१० भदौ ५ मा स्याङ्जा सिर्सेकोटमा भएको हो । उनी हाल पोखराको जरेवरमा परिवारसँगै बस्दै आएका थिए । परिवारमा श्रीमती हीरा गुरुङ, २ छोराहरु अम्बर र डा. शैलेस गुरुङ, बुहारी र एक नाति छन् ।

स्व. गुरुङको आइतबार पोखराको सेती नदी किनार शक्तिघाटमा अन्त्येष्टि गरिने परिवारजनले जनाएको छ । त्यसअघि पोखरामा शव ल्याई आइतबार बिहान १० बजेदेखि पोखरा इन्जिनियरिङ कलेज प्राङ्गणमा अन्तिम श्रद्धाञ्जलीका लागि राखिने छ।

हाम्रो सुझाव