लोककवि अली मियाँको १४ औं वार्षिक पुण्यतिथिमा वृक्षरोपण गरिएको छ ।

पोखरा–१३ मियाँपाटनमा आइतबार विहान आयोजित उक्त कार्यक्रमको वडाअध्यक्ष दर्शन लामाले शुभारम्भ गरेका थिए ।

त्यस अवसरमा प्रमुख अतिथि लामाले लोकगीतको माध्यमबाट जनताका आवाज बुलन्द बनाउने कवि मियाँ सबैका स्मृतिमा रहिरहेको बताए ।

अली मियाँ लोक वाङ्मय प्रतिष्ठानका अध्यक्ष हनिफ मियाँको अध्यक्षतामा भएको सो कार्यक्रममा सचिव पद्मराज ढकालले कवि मियाँको योगदानबारे प्रकाश पारेका थिए ।

वि.सं. १९७५ मा जन्मिएका कवि अली मियाँको ७९ वर्षको उमेरमा २०६३ साउन १८ गते निधन भएको थियो । जगदम्बा श्री पुरस्कारबाट सम्मानित कवि मियाँका लोक साहित्यका आधा दर्जन पुस्तक प्रकाशित छन् ।