पोखरा, २ वैशाख। आठौं राष्ट्रिय खेलकुद प्रतियोगितामा सहभागी हुने गण्डकी प्रदेशका खेलाडीको बिदाइ गरिएको छ।

गण्डकी प्रदेशका सामाजिक विकास मन्त्री नरदेवी पुनले पोखरा रंगशालामा आयोजित एक समाारेहमा उनीहरुको बिदाइ गरिन्।

मन्त्री पुनले गण्डकी प्रदेशका खेलाडीहरुलाई उच्च मनोबलका साथ प्रदर्शन गर्न आग्रह गरिन्। उनले सकारात्मक सोचका साथ प्रतिस्पर्धामा उत्रिए सही प्रतिफल आउने बताइन्।

गण्डकी प्रदेशका सांसद दीपक कोइरालाले गण्डकी प्रदेशमा अन्तराष्ट्रियस्तरका खेलहरुको आयोजना गर्न खेलकुदको पूर्वाधार आवश्यक रहेको औल्याए।

प्रदेशबाट कुस्ती बाहेक ३४ खेलमा ५ सय ५८ जना खेलाडीहरुले प्रतिष्पर्धा गर्ने कार्यालय प्रमुख लक्ष्मण योगीले जनाए। टोलीमा पुरुष ३ सय २ पुरुष र २ सय ५६ जना महिला खेलाडीहरुले यस प्रदेशबाट सहभागिता जनाउँदैछन्।

राष्ट्रिय खेलकुदअन्तर्गत पोखरामा यसअघि ट्रायथलन भएको भने पोखरामै प्याराग्लाइडिङ हुँदैछ। अधिकांश खेल प्रदेश ५ अन्तर्गत नेपालगञ्जलगायत सहरमा जारी छन्।

जिल्ला खेलकुद विकास समिति कास्कीका कार्यालय प्रमुख प्रकाश बरालका अनुसार विभिन्न खेल गरी १ हजार ३ सय ७ वटा स्वर्ण पदकको लागि हुने प्रतिस्पर्धामा गण्डकी प्रदेशले कम्तीमा पनि २८ स्वर्ण पदक ल्याउने अपेक्षा छ।

पश्चिमाञ्चल क्षेत्रीय खेलकुद विकास समिति अध्यक्ष सन्पन्न श्रेष्ठको अध्यक्षतामा भएको कार्यक्रममा राखेप सदस्य राजेशकुमार गुरुङ लगायतको सहभागिता थियो।

वैशाख ५ मा हुने उद्घाटन समारोहमा मञ्जु गुरुङको नेतृत्वमा मार्चपास हुनेछ।