पोखरा, १४ पुस। गण्डकी ट्रक व्यवसायी संघले आयोजना गरेको खुला रक्तदानमा १६ युनिट रगत संकलन भएको छ।

संघको ३८ औं वार्षिकोत्सव आयोजित कार्यक्रमको प्रमुख अतिथि संघका संस्थापक अध्यक्ष तेजनारायण तिमिल्सिनाले पहिलो रक्तदाता कार्यसमिति सदस्य नेत्रबहादुर खत्री ‘राजन’ लाई ब्लडब्याग हस्तान्तरण गरी उद्घाटन गरेका थिए।

तिमिल्सनाले रक्तदानलगायत सामाजिक उत्तरदायित्वका कार्यलाई संघले निरन्तरता दिन आग्रह गरे। संघसंस्थाले आफ्नो अधिकारको मात्र कुरा नगरी सामाजिक उत्तरदायित्वसमेत पूरा गर्नुपर्नेमा उनले जोड दिए।

कार्यक्रममा संघका निवर्तमान अध्यक्ष रवीन्द्र गिरी, पूर्व अध्यक्षहरु हरिप्रसाद खनाल र गोपालप्रसाद खनाल लगायतले शुभकामना मन्तव्य राखेका थिए।

संघका अध्यक्ष कृष्णहरि जिसीको अध्यक्षतामा भएको कार्यक्रममा रक्तदान कार्यक्रम उपसमिति संयोजक अनिलबिक्रम खाँडले स्वागत र महासचिव विष्णुमणि बरालले संचालन गरेका थिए।