पोखरा । अरण्यज्योति क्रिकेट क्लबको आयोजनामा पोखरा रंगशालामा जारी लुम्बिनी विकास बैंक अरण्यज्योति कपमा बिहीबार सांग्रिला क्रिकेट क्लब र काठमाडौंको क्रिकेट एक्सिलेन्स सेन्टर (सिइसी) विजयी भएका छन् ।

पहिलो खेलमा सांग्रिलाले तनहुँको पेलिकन्स क्रिकेट क्लबलाई १४ रनले पराजित गर्‍यो । टस हारेर व्याटिङ गरेको सांग्रिलाले १८.२ ओभरमा पुरा विकेट गुमाएर १ सय २ रन बनायो । राजु खनालले ३२ तथा विपिन खत्री र शरद भेषावकरले समान १८ रन जोडे ।

तनहुँको बलिङमा चन्द्रकान्त पौडेलले ४ विकेट लिए । जितका लागि १०३ रनको लक्ष्य पछ्याउनेक्रममा तनहुँको टोली १९.४ ओभरमा ८८ रनमै खुम्चियो । तनहुँको व्याटिङमा नवीन यादवले १९ तथा कृष कार्कीले १५ रनबाहेक अन्य व्याट्स्म्यानले दर्शनीय प्रदर्शन गर्न सकेनन् ।

प्लेयर अफ दी म्याच सांग्रिलाका बलर कृष्ण कार्कीले ३ विकेट लिए । त्यस्तै सिव्रिन श्रेष्ठले पनि ३ तथा नारायण जोशीले २, विपीन खत्री र शरद भेषावकरले एक एक विकेट लिए ।

अर्को खेलमा सिइसीले राइजिङ क्रिकेट क्लब पोखरालाई ६ विकेटले पराजित गरेको छ । पहिला व्याटिङ गरेको राइजिङले १४.५ ओभरमा सम्पूर्ण विकेट गुमाएर ५९ रनमात्रै बनाउन सक्यो । जसमा सन्दीप खत्रीले २९ तथा अनिल गुरुङले ९ रन हाने ।

म्यान अफ द म्याच सिइसीका सुवास खत्रीले ४ विकेट लिँदै पोखराको व्याटिङ लाइन अप कमजोर पारे । अविनाश बस्यालले ३ तथा किरण चन्दले २ विकेट लिए ।

६० रनको मात्र लक्ष्य पाएको सिइसीले १६ औं ओभरमा ४ विकेट गुमाएर जित हासिल गरेको हो । सिइसीका लागि विराट भण्डारीले अविजित ३४ रन बनाए ।

पोखराका बलर धीरज शाही ठकुरीले २ तथा करण केसी र कृष्ण पौडेलले एक एक विकेट झारे ।

आठ टिमले भाग लिएको प्रतियोगितामा आयोजक र बागलुङ क्रिकेट क्लब समूह ए बाट सेमिफाइनल प्रवेश गरिसकेका छन् ।

टि–२० आधारमा हुने प्रतियोगिता आगामी जेठ ८ सम्म सञ्चालन हुनेछ । विजेताले ८० हजार, उपविजेताले ४० हजार साथमा ट्रफी प्राप्त गर्ने छन् । उत्कृष्ट खेलाडीलाई ५ हजार, उत्कृष्ट बलर र उत्कृष्ट ब्याट्सम्यानलाई जनही २५ सय नगदसहित ट्रफी प्रदान गरिने छ ।