पोखरा । दसैं तथा तिहारका अवसरमा पोखरा १३ आर्वास्थित जागरण आमा समूहको भवनमा प्रस्तुत गरिएको विविध सांस्कृतिक कार्यक्रम तिहार, नेपाल संवत् तथा छठको अवसर पारेर समापन गरिएको छ ।

आर्वाली आदर्श नाट्य केन्द्र र मोहरपानी आदर्श टोल विकास संस्थाको संयुक्त आयोजनामा भएको सांस्कृतिक कार्यक्रमसँगै ‘हाम्रो समाज’ नाटकको भाग २ प्रदर्शन गरिएको थियो । नाटकमा ३३ जना स्थानीय कलाकारले अभिनय गरेका थिए । नाटक लेखन तथा निर्देशन शिवराज बरालले गरेका हुन् ।

कार्यक्रममा स्थानीय तथा चर्चित कलाकारको सांगीतिक प्रस्तुति, विभिन्न नृत्यहरु, हास्य प्रहसनका साथै लोक दोहोरी कलाकारहरु अम्मर धिताल, रामजी पौडेल, कृष्ण भट्टराई, कमला सुनार, लक्ष्मी नेपालीलगायतले लोक दोहोरी गीत प्रस्तुत गरेका थिए ।

कार्यक्रमको उद्घाटन गर्दै पोखरा १३ का अध्यक्ष किरण बरालले यस प्रकारका कार्यक्रमलाई वडाले सधैं साथ दिने बताए ।

आर्वाली आदर्श नाट्य केन्द्रका संयोजक शिवराज बरालको अध्यक्षतामा भएको कार्यक्रममा सचिव विक्रम बरालले सञ्चालन तथा श्री मोहरपानी आदर्श टोल विकास संस्थाका अध्यक्ष श्रीराम सिग्देलले स्वागत गरेका थिए ।