हेमजा । हेमजा युनाइटेड आयोजनामा हुने छैटौं नेपाल आइस अन्तर्राष्ट्रिय हेमजा गोल्डकप–२०७९ को तयारी अन्तिम चरणमा पुगेको छ ।

संस्थाले सोको लागि पोखराको अमरसिंह, बिरौटा, दीप, जौवारी, हेमजास्थित मिलनचोक र फेदीमा प्रवेशद्वार निर्माण गरिसकेको छ । खेलमैदान व्यवस्थित गर्ने कार्यसमेत सकिएको अध्यक्ष इन्द्रबहादुर कुँवरले जानकारी दिए ।

असार ४ देखि ११ सम्म चल्ने उक्त कपको उद्घाटन खेल आयोजक हेमजा युनाइटेड र वीरगञ्ज युनाइटेडबीच हुने भएको छ ।

प्रतियोगितामा विभागीय क्लब एपिएफ, चर्च ब्वाइज, विदेशी अफ्रिकनी टिम क्यामरुन, कमलटार, कालिका स्पोट्र्स चितवन, बागमती युवा क्लब सर्लाही, वीरगञ्ज युनाइटेड र आयोजक हेमजा युनाइटेडको सहभागिता रहनेछ ।

विजेताले ६ लाख र उपविजेताले ३ लाख साथमा सिल्ड, मेडल र प्रमाणपत्र पाउने छन् । सर्वोत्कृष्ट खेलाडीलाई ५० हजार साथमा ट्रफी, सर्वाधिक गोलकर्ताले २५ हजार, उत्कृष्ट डिफेन्डर, मिडफिल्डर, फरबार्ड, गोलरक्षक तथा उदीयमान खेलाडीले जनही २०÷२० हजार रकम प्राप्त गर्नेछन् । अनुशासित टिमलाई २५ हजार रुपैयाँ दिइनेछ ।

आयोजक युनाइटेडले प्रतियोगितासँगै हेमजाबाट अन्तर्राष्ट्रियस्तरको खेलाडी उत्पादन गर्नुका साथै पोखरा २५ भित्र रहेका हरेक विद्यालयलाई खेलकुदको हवका रुपमा विकास गर्न सहयोग पुग्ने विश्वाससमेत लिएको छ । प्रतियोगिताको नेपाल आईसले प्रायोजन गरेको छ ।