१. संसद्को बैठकमा एक जना मन्त्री पनि उपस्थित नभएको कारणले संसद्को कारबाही स्थगित गर्नुपरेको कुरा अहिले चर्चाको विषय भएको छ।संसद्को बैठकमा सांसदहरूले मन्त्री र सरकारसँग अनेक प्रश्न सोध्ने गर्दछन् र आफूलाई लागेको प्रश्न सोध्ने गर्दछन्। तर सरकारका तर्फबाट एक जना मन्त्री पनि उपस्थित नभएपछि कसलाई सुनाउने भनी सांसदहरू प्रश्न गर्दछन्।

२. संसद्को बैठक महत्त्वपूर्ण हुन्छ।बैठकमा सांसदहरूले आ-आफ्नो विचार व्यक्त गर्दछन्। उनीहरूलाई सरकारलाई सुझाव दिन्छन् र कहिँ कुनै चित्त नबुझेको कुरा भएका रहेछ भने त्यसको आलोचना पनि गर्दछन्। उनीहरूले सोधेको प्रश्नको जवाफ दिनु सरकारको कर्तव्य हुन्छ। त्यसैले बैठकमा सरकारको प्रतिनिधिको उपस्थिति अनिवार्य प्रायः हुन्छ।

३. तर हाम्रा मन्त्रीहरू संसद्मा घोचपेच र आफ्नो आलोचना सुन्नुपर्ला भनेर संसद्को बैठकमा अनुपस्थित हुने गर्दछन्। उनीहरू संसद्को बैठकलाई भन्दा अन्य उद्घाटन र स्वागतको कार्यक्रमलाई महत्त्व दिएर अन्यत्र जाने गर्दछन्। त्यहाँ लामा-लामा भाषण दिएर अर्ति उपदेश दिने गर्दछन्।

४. हामीमध्ये पनि अधिकांश आफ्नो सानोतिनो कार्यक्रममा पनि मन्त्रीलाई बोलाउने गर्दछौँ। मन्त्रीबाट उद्घाटन गराउन पाए आफ्नो कार्यक्रम सफल भएको सम्झन्छांै। त्यसमा हाम्रो चाकडी मानसिकता छिपेको हुन्छ र मन्त्रीको नजिक भएर रवाफ देखाउने आकांक्षा अन्तर्निहित हुन्छ। तर त्यसबाट देशको के-कति क्षति हुन्छ भन्ने कुरा न मन्त्रीले सोचेका हुन्छन्, न कि आयोजकले त्यसको मूल्याड्ढन नै गरेका हुन्छन्।

५. सायद् यिनै कुरालाई दृष्टिगत गरेर अर्थमन्त्री डा. रामशरण महतले काठमाडौंमा आयोजित एक कार्यक्रममा अब बोल्ने बेला होइन, काम गर्ने बेला आएको बताएका थिए। प्रधानमन्त्री सुशील कोइराला पनि धेरै बोल्दैनन् र धेरै बोल्ने पक्षमा छैनन्। तर मन्त्रीहरूले भने त्यो बोल्ने बानी परित्याग गरेका छैनन्।

६. भरखरै मन्त्री भएकाहरूका लागि स्वागत खानुको स्वाद नै अर्कै हुन्छ। तर धेरै स्वागत खाए भने त्यसको बानी बिग्रन्छ। त्यस्तो व्यक्ति चाकडीवालाहरूको चक्रब्यूहमा फँस्दछ र तिनीहरूको दबाबमा खराब निर्णय गर्न बाध्य हुनुपर्दछ। माथि पुगेका धेरैलाई त्यस्तो रोले सताएको हुन्छ।

७. सरकार र सदन एक अर्काका पूरक हुन्। सरकारलाई सदन चाहिन्छ। सदनलाई सरकार चाहिन्छ। सदनको बैठक देश, जनता र सरकारका लागि विशेष महत्त्वको हुन्छ। जनताले सदनमा कसले के बोले त्यो हेरिरहेका हुन्छन्। साथै त्यहाँ साधिएका प्रश्नको सम्बन्धित मन्त्रीले के-कति राम्ररी जवाफ दिए त्यो पनि नियालिरहेका हुन्छन्। त्यसकारण सदनको बैठकमा मन्त्रीको उपस्थिति आवश्यक मानिन्छ। मन्त्री उपस्थिति हुने प्रावधान बनाइएको हुन्छ।