पोखरा। तमु (गुरुङ) समुदायको सामाजिक संस्था तमु धिं नेपाल ४० औं वर्षमा प्रवेश गरेको छ । शनिबार गण्डकी प्रदेशका नवनियुक्त मुख्यमन्त्री, मन्त्रीलाई स्वागत तथा सम्मान, सांस्कृतिक कार्यक्रम गरी तमु धिंले स्थापना दिवस मनाएको हो ।

कार्यक्रममा गण्डकीका मुख्यमन्त्री खगराज अधिकारीले तमुहरुको उद्गमथलो क्होलासोथरलाई अन्तर्राष्ट्रिय सम्पदामा सूचिकृत गर्ने बताए । तमु धिंको हरेक कार्यमा आफ्नो साथ सहयोग रहने उनले सुनाए । ‘म पदमा हुँ वा नहुँ मेरो पहिलो काम नेपालको महत्वपूर्ण जाति तमुको आदिमथलो क्होलासोथरलाई अन्तर्राष्ट्रिय सम्पदामा सूचिकृत गरेर विश्वसामु ‘मक्का मदिना’ जसरी इस्लाम धर्मको हुन्छ, त्यस्तै आदिवासी जनजातिको ‘मक्का मदिना’ बनाइछाड्ने संकल्प गर्न चाहान्छु,’ उनले भने, ‘म २०७४ मा प्रतिनिधि सभामा पुग्दा क्रपू डाँडासम्म पुग्नका लागि झण्डै लाख विनियोजन गरेको थिएँ ।’

सो अवसरमा गण्डकी विश्वविद्यालयका कुलपति प्राडा गणेशमान गुरुङलाई गणेशबहादुर गुरुङ स्मृति शैक्षिक सम्मान अर्पण गरिएको थियो । शैक्षिक क्षेत्रमा विशेष योेगदान पु¥याएका तमु धिं सल्लाहकार प्रमुख डा. गणेशबहादुर गुरुङको स्मृति कोषबाट गणेशमान गुरुङलाई १ लाख ११ हजार १ सय ११ रुपैयाँसहित भांग्रा, फेटा, खादा र प्रमाणपत्रद्वारा सम्मान गरिएको हो ।

उनलाई मुख्यमन्त्री अधिकारी, स्व. गणेशबहादुरको परिवार, तमु धिंका संस्थापक अध्यक्ष कर्म तमु, अध्यक्ष हुमबहादुर तमुले सम्मान अर्पण गरेका थिए । स्व. गणेशबहादुर गुरुङबारे तमु धिंका केन्द्रीय सदस्य तथा संस्कृतिक विभाग प्रमुख कृष्णकुमार गुरुङ र पुरस्कृत गुरुङका बारे तमु धिंका शिक्षा विभाग संयोजक श्रीजङ गुरुङले परिचय दिएका थिए ।

कार्यक्रममा गण्डकीका नवनिर्वाचित मुख्यमन्त्री अधिकारीसहित मन्त्रीहरु हरिबहादुर चुमान, वेदबहादुर गुरुङ ‘श्याम’, सीता सुन्दास र राजीव गुरुङलाई खादा, फेटा, भांग्रा र घलेकले सम्मान गरिएको थियो ।
अध्यक्ष हुमबहादुर तमुको अध्यक्षतामा भएको कार्यक्रममा स्वागत वरिष्ठ उपाध्यक्ष श्रीप्रसाद गुरुङ र सञ्चालन सचिव जुमकाजी गुरुङ गरेका थिए । स्थापना दिवसकै अवसरमा पोखरा ९ स्थित शान्ति वनवाटिकामा सरसफाइ गरिएको थियो भने तमु युवा संघले रक्तदान कार्यक्रम गरेको थियो । कार्यक्रममा ७९ युनिट संकलन भयो ।