१. दुर्इ ध्रुवमा विभाजित नेताहरू सम्वादहीनताको स्थिति पुगेर राजनीतिमा जुन अन्यौल र अनिश्चयको कालो बादल मडारिएको थियो, त्यो हट्ने संकेत देखिएको छ। प्रधानमन्त्री सुशील कोइराला र एमाओवादी अध्यक्ष पुष्पकमल दाहाल चितवनको एक कार्यक्रममा एउटै मञ्चमा देखिएपछि क्षितिज केही उज्यालो देखिन थालेको छ।

२. खास गरेर एमाओवादी अध्यक्ष दाहालले प्रधानमन्त्री कोइराला तथा एमालेका वरिष्ठ नेता माधव नेपालसँग दुर्इ पक्षीय अनौपचारिक भेटवार्ता गरेपछि स्थिति अनुकूल भएको हो। नेताहरूले औपचारिक वार्ताका लागि प्रयास गरिरहेका छन्। केही दिनभित्र औपचारिक वार्ता हुने अपेक्षा गरिएको छ।

३. वार्ताका लागि वातावरण बनाउन नेताहरूमा एक किसिमको समझदारी भएको छ। त्यसरी भएको समझदारी अनुसार सत्तारूढ पार्टी रूले संविधानसभामा प्रारम्भ गरेको प्रक्रियामा जाने कुरा स्थगित गर्ने र उता ३० दलीय गठनबन्धनले दोस्रो चरणको सडक आन्दोलन स्थगित गर्ने भएका छन्। हाललाई यसलाई पनि उपलब्धि मान्नुपर्ने भएको छ।

४. हाम्रा नेताहरूको दिमाग अहंकारले भरिएको छ। उनीहरू आक्रोशित भएको बेलामा अरुलाई गन्दैनन्। उनीहरू बल मिचेर भए पनि अरुलाई पराजित गर्ने स्वप्न देख्दछन् र तदानुसारको रणनीति र नीतिको तानावाना बुन्दछन् तर त्यो रणनीति र नीति व्यवहारमा जब कार्यान्वयन हुन्छ, उनीहरूले अपेक्षा गरेको प्रतिफल देख्दैनन् र होशमा आउँछन्।

५.अहिले उनीहरू त्यही होशमा आएको अवस्था छ। यसबीच एमालेले प्रक्रियामा गएर छिटो संविधान जारी गर्न प्रधानमन्त्रीलाई दबाब दिएका छन् भने एमाओवादी वरिष्ठ नेता डा. बाबुराम भट्टराई भारतमा पुगेर भारतलाई १२ बुँदे समझदारीको बेलामा जस्तै गरी भारतको सक्रियताका लागि गुहार मागेका छन्।

६. नेपालका नेताहरू आफूलाई अप्ठ्यारो पर्नासाथ या आफू कमजोर हुनासाथ नेताहरूलाई गुहार्ने चलन छ। जसलाई सामान्य नेपालीहरूले कहिले राम्रो मान्दैनन्। अहिले अको एक धार्मिक पक्षले पनि भारतको सहाराका लागि हात फैलाउँदैछन्। भारतमा भारतीय जनता पार्टीका सरकार आउनासाथ यहाँ त्यो पक्षको सक्रियता र सलवलाहट बढेको छ।

७. त्यो जे भए पनि नेताहरू अहिले यथार्थको धरातलमा आउन खोजेका छन्। यो एक सकारात्मक कुरा हो। सामन्यतया जेठ १५ मा संविधान जारी गर्ने अघोषित सहमतिमा उनीहरू पुगेका छन्। तर अब फेरि सानातिनो कुरामा हलो अड्काएर गोरु पिट्ने काम गर्नुहुँदैन। दुवै पक्ष लचिलो हुनुपर्दछ। लचिलो हुनु कमजोर हुनु होइन, यो कुरा महसुस गरी संविधान जारी गर्ने सहमति गर्नुपर्दछ।