विश्वभर महामारीरुपमा फैलिएको कोरोना भाइरस जोखिमबीच आफ्नो पेसालाई निरन्तरता दिँदैआएकोमा आखिर मलाई पनि कोभिड–१९ ले शिकार बनायो । दुई दशकदेखि क्यामरा–कलम–डायरीसहित जहाँ जोखिम त्यहीँ पुगेर रिपोर्टिङ गर्ने मेरो दैनिकी एक महिना लामो समयदेखि आइसोलेसनमा खुम्चियो । यसैबीचमा समय एवं आर्थिक क्षति, मानसिक तनाव, कोरोना संक्रमितलाई समाजले हेर्ने नकारात्मक दृष्टिको घेरोले झनै बेचैन बनायो । संक्रमणको ठिक एक महिनामा मात्र रिपोर्ट नेगेटिभ आयो ।
हाल म इमेज च्यानलको लागि पोखरा व्यूरो प्रमुख तथा रेडियो बाराही ९९.२ मेघाहर्ज, पोखरामा समाचार संयोजक छु । यसका अलावा फोटो पत्रकार समूह कास्की अध्यक्ष, नेपाल प्रेस युनियन कास्की सचिवको गहन जिम्मेवारी पनि काँधमा छ । साथै आफ्नो दैनन्दित क्रियाकलाप, परिवार, नातागोता, इष्टमित्र, साथीसङ्गी त छँदैछन् । पत्रकारिता पेसामा लागिसकेपछि चौबीसैघण्टा विविध घटनाक्रम अपडेटमा चनाखो हुनुपर्ने । कोरोनाविरुद्ध छेलिएर रिपोर्टिङ गर्दैगर्दा असोज तेस्रो साताबाट बेचैन सुरु भएको हो । यहीँ संकटभित्र वर्षदिनमा आउने महान् चाड दसैंँ गएको पत्तै भएन ।
कुरो असोज २२ गतेको हो । बिहानैदेखि शरीरमा दुखाइ सुरु भयो । नियमितरुपमा सकेसम्म मर्निङवाक जाने गरेकोमा त्यस दिन जान सकिनँ । बिहानीको खाना खाइसकेपछि नियमित कामका लागि भने रेडियो बाराही गएँ । कार्यसम्पादन गरिसकेपछि दिउँसो २ बजे कार्यालयबाट निस्किएर नेपाल प्रेस युनियनद्वारा संचालित ‘शान्ति पत्रकारिता पुरस्कार’ को प्रतिभा छनौट समितिको बैठकमा सहभागी हुनुपर्ने थियो । संस्थाको सचिव नाताले मेरो उपस्थिति अनिवार्य थियो । बैठकस्थल न्यूरोड थियो ।
करिब ३० मिनेटको बैठक भने मलाई ३ घण्टाजस्तो लाग्यो । त्यहाँ उपस्थित अंकल रमेश पौडेल, दाजु भोला बराल, प्रेस युनियन अध्यक्ष नवीन सिग्देललगायत हुनुहुन्थ्यो । बैठकको अन्त्यतिर झनै जीउ दुखेपछि दाइहरुले बसबस भन्दाभन्दै पनि अदालतमा काम भएको जनाउसँगै निस्कें । जिल्ला अदालत जाँदा दिउँसो ४ बजिसकेको थियो । त्यहाँ मेरो काम नभएपछि पुनः रेडियो जान भनी हिडें । सिढीं उक्लिन नसकेपछि नजिकै पत्रकार विजय नेपालको पसलमा थुचुक्क बसेँ । विजय थिएनन् । भाइ रिजन थिए । समाचार अपडेट के रहेछ भनी इन्टरनेट सर्फिङ थालें । तर एक्कासी मेरो टाउको घुमाउन थाल्यो । साँझ रेडियोमा समाचार प्याकेज बनाउन नसक्ने कुरा रेडियो बाराहीमा कार्यरत शशि पौडेललाई फोन गरेर जानकारी दिएँ । उनले साँझ ६ बजेको मुख्य समाचारको लागि समाचार अपडेट सम्हाल्ने भए । म शरीरमा अत्यधिक दुखाइ भएकोले तत्कालै उपचारार्थ सञ्चो मेडिकल हल गएँ ।
केहीबेरको पर्खाइपछि कृष्ण पाण्डे आउनु भयो । प्रेसर र ज्वरो नाप्नु भयो । मलाई १०१ फरेनहाइट ज्वरो आएको रहेछ । कोरोना संक्रमणको लक्षण हुनसक्ने संकेत गर्नुभयो । सिटामोल खाएँ । रन्थनिँदै घर गएँ । निकै गाह्रो भएकोले बेडमा पल्टिएँ । टाउको दुखाइ र ज्वरो क्रमशः बढ्दै गएको थियो । तैपनि सहन सक्ने गरी सहेँ ।
यता, फोटो पत्रकार राम गुरुङ र कृष्णमणि बराल आफू संक्रमित भएको खबर सामाजिक सञ्जालमार्फत गराइसक्नुभएको थियो । लक्षण मिल्दोजुल्दो रहेकोले साँच्चिकै कोरोना भयमा स्वाब दिने विचार गरेँ । पोखरा महानगरपालिकाका स्वास्थ्य महाशाखा प्रमुख हेमन्त शर्मा पौडेललाई फोन गरें । उहाँले भोलिपल्ट असोज २३ मा भौतिक पूर्वाधार मन्त्रालयमा कर्मचारीहरुको स्वाब लिने कार्यक्रम भएकाले त्यही जान सल्लाह दिनुभयो ।
असोज २३ गते स्वाब दिन जाँदा ४ घण्टासम्म कुर्नु पर्यो। ज्यान दुखाइ सहन नसकेपछि मन्त्रालय परिसरको चौरमै सुतें । कोरोनाको नियमित रिपोर्टिङ गर्दैआएकोमा म पहिलोपल्ट स्वाब दिएर घर फर्केँ । सिटामोलले पनि ज्वरो घटेको थिएन । डा. बुद्धिबहादुर थापाको सल्लाह अनुसार केही थप औषधी खाएँ । ती औषधीले पनि काम गरेनन् । समस्या बल्झिदै गयो । खाना खान मन नलाग्ने । खाए पनि वान्ता होलाजस्तो हुने । स्वाद हराउने भयो । रिपोर्ट नआउँदै कोरोना भएको अनुमान गरिसकेको थिएँ ।
स्वाब परीक्षणको तेस्रो दिन रिपोर्ट आउने भनिएको थियो । उक्त दिन बिहान ११ बजे नमुना परीक्षण केन्द्रका प्राविधिकसँग बुझ्दा मलाई कोरोना संक्रमण भएको दुःखद खबर आयो । त्यहीँ दिन दिउँसो ४ बजे स्वास्थ्य महाशाखाअन्तर्गत कर्मचारीले मलाई कोरोना लागेको औपचारिक जानकारी गराए । जीवनजीले फोन गर्दै घरमा बस्नुहुन्छ कि अस्पताल जानुहुन्छ भनी जिज्ञासा राख्नुभयो । मैले घरमै आइसोलेसनमा बस्छु भनें । र, आफू संक्रमित भएको सामाजिक सञ्जाल फेसबुकबाट यसरी जानकारी दिएँ– “कात्तिक २३ गते शुक्रबार स्वाब दिएको थिएँ । आज रिपोर्ट आउँदा मलाई पनि कोरोना पोजेटिभ पुष्टि भयो । म घरमै बसेर स्वास्थ्यलाभ गरिरहेको छु । यो बेला माया र सद्भावको खाँचो सबैलाई हुन्छ । संक्रमण हुँदैमा कसैले कसैलाई नराम्रो नजर नलगाउनुहोला । ढिलोचाँडो जोकोहीलाई कोरोनाले छुने अवस्था सिर्जना भएको छ । छिट्टै नै यो समस्याबाट मुक्त भएर फेरि पत्रकारिताको मैदानमा भेट हुने नै छ । सहयोगका लागि धन्यवाद ।”
फेसबुक पोष्ट्याई के गरेको थिएँ तारन्तर घण्टी बज्न थाल्यो । केही फोन रिसिभ गरे पनि पछि रिसिभ गर्न नसक्ने अवस्थामा पुगेँ । ज्वरो र टाउको दुखाइसँगै खोकी लागेकोले पीडा सहन गर्न नसकी बाध्य भई स्वीच अफ गरेर सुतें ।
क्वारेन्टाइनबाट आइसोलेसन बसाइँ सुरु भयो । च्याट ग्रुपमा साथीहरुले भने कोरोना लागिसकेपछि ख्याल गर्नुपर्ने विषयसहित केही हाँसोठट्टा पनि गर्थे । म भने पीडाले रातभर निदाउन सकेको थिइनँ । सुती सुती कुरा गर्ने कोसिस गर्थें । उता मुटुरोगी समेत राम गुरुङले कति सुतेको ? भनी गाली गर्नुहुन्थ्यो ।
घरमा श्रीमती र छोरा पनि भएकोले उनीहरु आत्तिन्छन् कि भनेर दुखाइ सहेरै बसेँ । संक्रमित भएको चौथो रात छट्पटी भयो । राति वान्ता र पखाला भयो । शरीर शिथिल बन्यो । श्रीमतीको फोनपछि मध्यरात १२ बजे अंकल रमेश पौडेलले जीवनजल, औषधी, फलफूल अर्का काका शहदेवमार्फत पठाइदिनुभयो । सो खाएपछि २ बजेपछि हल्का महसुस भयो ।
यसअघि असोज १९ मा मेरै अध्यक्षतामा फोटो पत्रकार समूह कास्कीको बैठक सम्पन्न भएकोले बैठकमा उपस्थित साथीहरुले पनि स्वाब दिने भए । सहभागी ६ मध्ये २ जनाको रिपोर्ट पोजेटिभ आयो । श्रीमती र छोरा पनि कन्ट्याक्ट टे«सिङमा परेकोले असोज २९ मा मालेपाटनस्थित कृषि तालिम केन्द्रमा स्वाब संकलन भयो । तर रिपोर्ट आउन ढिला भयो । ५ दिनसम्म पनि नतिजा आएन । प्रदेश सरकारले स्वाब संकलनको २४ घण्टामै रिपोर्ट सार्वजनिक गर्ने दाबी गरे पनि यतिका दिनसम्म रिपोर्ट दिन नसक्दा उनीहरुको पनि चिन्ता थपिँदै थियो । सूचनाबारे सहज पहुँच राख्ने हामी संचारकर्मीकै घरपरिवारका सदस्यको यस्तो हालत छ भने सर्वसाधारणको के होला ? भन्ने महसुस गरेँ । सरकारको रवैयाले कोरोना संक्रमण न्यूनीकरण तत्काल हुन नसक्ने भन्ने लाग्यो ।
आफू संक्रमित भए पनि परिवारका सदस्यको नेगेटिभ आइदिए हुन्थ्यो भन्ने आशा थियो । तर भनेजस्तो भएन । घटस्थापनाको पर्सिपल्ट कात्तिक ३ मा आमाछोरा दुवैको रिपोर्ट पोजेटिभ आयो । अब मलाईभन्दा पनि श्रीमती र छोराको चिन्ताले सताउन थाल्यो । सचेतना अपनाउँदै आइसोलेसनमा बस्दा पनि उनीहरुलाई कसरी सरेछ भन्ने लाग्यो । अब घरका तीनै जना संक्रमित भएपछि उपाय लागेन । हामीसँगै खाना पकाउने र खाने गर्न थाल्यौं । छोरालाई कुनै लक्षण थिएन । श्रीमतीलाई हल्का लक्षण देखियो ।
संक्रमणपछि यसको औषधी उपचार नभएकोले सबैले झैं घरेलु उपाय अपनायौं । बिहान योगा ध्यान गर्ने, तातो–तातो खाने, वाफ लिने, प्रशस्त फलफूल खाने लगायत पढेको, देखेको र सुनेको सबै क्रियाकलाप ग¥यौं । यसैबीचमा कात्तिक १० गते बडादसँै थियो । दुःखलाई केही समय भुलेर पनि आपसका छिमेकीले टीका लगाएको घरको रैलिङबाटै हेरें । पहिलो पल्ट हो, दसैँ कोही घरमा आएनन्, हामी कोही गएनौं ।
यसरी संक्रमणको २१ औं दिन अर्थात् कात्तिक १५ गते मलगायत तीनै जनाले स्वाब दियौं । तीमध्ये छोराको रिपोर्ट नेगेटिभ आयो । हामी दम्पतीको पुनः पोजेटिभ आयो । उदेक लागेर आयो । तैपनि छोरा कोरोनामुक्त भएकोले आधा खुसी फर्कियो । त्यसको एक सातापछि पुनः तेस्रो पीसीआर रिपोर्ट नेगेटिभ आएपछि परै खुसी फर्किएको महसुस गरेको छु । यसबीचमा मेरो स्वास्थ्यप्रति चिन्ता व्यक्त गर्ने सम्पूर्ण शुभचिन्तकप्रति आभारी छु ।
गण्डकी प्रदेश राजधानी पोखरामा सरकारीस्तरबाट हाल २ वटा ल्याबमा कोरोना परीक्षण हुँदैआएको छ । एउटा निजी ल्याब हालै संचालनमा आएको हो । प्रदेश मुख्यमन्त्रीले अन्य प्रदेश तुलनामा गण्डकीमा कोरोना जोखिम कम रहेको र नयाँ मेसिन जडानले २४ घण्टाभित्रै रिपोर्ट दिन सक्ने दाबी गर्दैआएका छन् । तर उनको भनाइ सामाजिक सञ्जालमा छाउन र भाषण गर्नैमात्रै हुने देखिन्छ । उच्च पद तथा पहुँचवालाको रिपोर्ट आजको भोलि आइसक्दा सर्वसाधारणको रिपोर्टमा ढिलाइले अझ सन्त्रास र जोखिम बढाएको महसुस गरेको छु ।
यता, एकथरि कोरोना केही होइन भनी गफ चुट्नेहरु स्वयम् संक्रमित भएपछि थाहा पाउने नै छन् । वैज्ञानिक तथ्य प्रमाण अझसम्म फेला नपरेकोले हल्लैहल्ला र अनुमानको भरमा बोल्ने बढी छन् । कोरोनाबाट बच्न स्वास्थ्य सचेतना अपनाउनै पर्दछ । दुइतिहाइको सरकार भए पनि केही गर्दैन । नागरिक आफै सचेत हुनुपर्छ । सरकारको काम भनेको एक कल फोनमात्रै हो । लाग्छ, परीक्षणक्रममा ठेगाना विस्तृत नभएको भए त्यही एक कल पनि आउँदैनथ्यो । कोरोनापछि उत्पन्न तनावले संक्रमित भएर यसरी बसिरहनुभन्दा पीसीआर चेक नगर्नु नै बेस माने । सरकारले यति जनाको पिसिआर भयो, यति जना संक्रमित भए । यति जनाको मृत्यु भयो भन्ने तथ्यांक दिनुबाहेक नागरिकप्रति निर्वाह गर्नुपर्ने दायित्व अरु केही देखाउन सकेको छैन ।
कोरोना पोजेटिभको १४ दिनपछि लक्षण नदेखिए अरुलाई सर्दैन र आफूलाई पनि सर्दैन भनी सरकारले सूचना जारी गरे पनि समाजले त्यस्तो स्वीकार्दैन । समाजले नेगेटिभ नै रिपोर्ट खोज्छ । सामाजिक उत्तरदायित्वसहित आफू संक्रमित भएको सार्वजनिक गरेकोमा समाजले संक्रमितलाई हेर्ने दृष्टिकोण परिवर्तित नभएकोले अहिले लाग्छ– सार्वजनिक नगरेकै बेस । आत्मग्लानी महसुस पनि छ ।
फरक–फरक ल्याबमा फरक रिपोर्ट आउने गरेको पनि सामाजिक सञ्जालमा देख्न पाइन्छ । यसबाट पनि ल्याब रिपोर्टको विश्वासनीयतामा कमी आएको छ । दुविधा उत्पन्न गराएको छ । सरकारको अनुगमन छैन । कार्यशैली फितलो छ । अस्पतालमा बेड पाउन मुस्किल छ । कोभिड–१९ का अलावा अन्य रोगका बिरामीले पनि उपचारै नपाएर मर्नुपर्ने अवस्था छ ।
जाँदाजाँदै यो भन्छु, रोगले खासमा बच्चा, युवा र वृद्ध चिन्दैन । उमेर अनुसार छुट्टाछुट्टै भाइरस बनेको छैन । कम्तीमा बच्चा तथा वृद्धहरु अलि बढी सचेत हुनु जरुरी देखिन्छ । कोरोना संक्रमण आफूलाई कहिल्यै लाग्दैन भनेजस्तो गरी व्यवहार देखाउनु मुर्खता हो ।
Related News
सम्बन्धित समाचार
कास्की कांग्रेसको शिखर पुरूषको अवसान
जून ओर्लेको रात र त्यसको आलोक
नयाँ बिहानी: आदर्श समाजको २९ औं वर्ष
गण्डकी प्रदेश प्रशिक्षण प्रतिष्ठानका ४ वर्ष र आगामी कार्यदिशा
राणा कालमै हलो जोत्ने क्रान्तिकारी पं. मुक्तिनाथ
hero news full width
मुख्य समाचार
त्रासैत्रासमा तंग्रिदै कागबेनी
मनिपालमा अत्याधुनिक एमआरआई मेसिन
वैशाख १३, २०८११३ वटा मुद्दा चलेका एक युवा पोखराबाट अटोमेटिक पेस्तोलसहित पक्राउ
वैशाख १३, २०८१कतारी अमिर स्वेदश फिर्ता : पोखरा–कतार उडान माग
वैशाख १३, २०८१कास्कीमा एसइई उत्तरपुस्तिका परीक्षण रोकियो
वैशाख १२, २०८१गण्डकीमा डायलाइसिसका लागि अब पालो कुर्न नपर्ने
वैशाख १२, २०८१