पोखरा ।गण्डकी प्रदेशको अर्थ तथा विकास समितिले प्रदेश बजार अनुगमन समितिलाई कार्ययोजना बनाएर बजार अनुगमन गर्न निर्देशन दिएको छ ।

आइतबार समितिले प्रदेश बजार अनुगमन समितिका पदाधिकारीहरुसंग बजारको पछिल्लो अबस्थाको बारेमा छलफल गर्दे समितिले बजार अनुगमन कार्ययोजना बनाएर गर्न र त्यसको रिपोर्ट त्रैमासिक रुपमा अर्थ तथा विकास समितिमा पेश गर्न पनि अनुगमन समितिलाई निर्देशन दिएको हो ।

समिति सभापति दीपक कोइरालाले बजारमा ग्याँसको अभाव सृजना भएको खाद्यानमा मृल्यवृद्धि भएको, सामानको कृतिम अभाव सृजना भएको जस्ता गुनासो समितिमा आएको भन्दै अनुगमन समितिलाई कडाईका साथ अनुगमन गर्न निर्देशन दिए । विश्व उपभोक्ता अधिकार दिवसको शुभकामना दिँदै सभापति कोइरालाले जनताको दैनिकीमा प्रत्यक्ष प्रभाव पार्ने उपभोग्य खाद्यान्नमा विशेष ध्यान दिन अनुगमन समितिलाई आग्रह गरे । अनुगमन समिति सदस्य एवं आन्तरिक मामिला तथा कानून मन्त्रालयका सचिव किरणराज आचार्यले अनुगमनकोक्रममा उपभोक्ताले स्टक राख्ने, ब्यापारीले मौका छोप्ने जस्ता क्रियाकलाप गरेको पाइएकोले बजारमा केही समस्या देखिएको बताए । सरकारी संयन्त्रबाट नियमन र अनुगमन बढी आवश्यक देखिएको उनको भनाइ छ ।

उद्योग बाणिज्य तथा उपभोक्ता हित सरक्षंण निर्देशनालयका निर्देशक गोकुल शर्मा पौडेलले बजारमा ६ महिनालाई पुग्ने खाद्यान्न, एलपी ग्याँस र ३ दिनलाई पुग्ने इन्धन रहेको बताए ।
माक्समा कालोबजारी गर्नेलाई काराबाही भएको भन्दै बजार अनुगमन तीव्ररुपमा गरिएको उनले जनाए । उपभोक्ता मञ्च गण्डकी प्रदेशका अध्यक्ष कपिलनाथ कोइरालाले सरकारले खाद्यान सामाग्री यथेष्ट छ भनिए पनि बजारमा भने समस्या देखिएको बताए । बजारमा अनुगमनको तौरतरिका पुरानै भएकोले बजारमा कालोबजारीमा कमी नआएको उनको भनाइ छ