पोखरा । जनकल्याण पोखरा–११ टिम प्रथम क्लबस्तरीय पुरुष भलिबल प्रतियोगिताको फाइनलमा प्रवेश गरेको छ ।

शुक्रबार नदीपुरस्थित नेपाल छन्त्याल समाजको भलिबल कोर्टमा भएको पहिलो सेमिफाइनलमा माछापुच्छ्रे गुराँसे भूमि घाचोकलाई ३–१ सेटमा हराउँदै उपाधि नजिक पुगेको हो । जनकल्याणले पहिलो सेट २५–१९ ले जिते पनि दोस्रो सेट २०–२५ ले गुमाएको थियो । तेस्रो र चौंथो सेट क्रमशः २५–१३ र २५–२१ सेटले जितेर उत्कृष्ट पुनरागमन गरेको हो । खेलमा जनकल्याणकै भूपेन गुरुङ म्यान अफ द म्याच घोषित भए ।

यस्तै, दोस्रो सेमिफाइनलमा भने लाइट प्रोटेस्टका कारण स्थगित भयो । जिभिपी युके लन्डन र माछापुच्छ्रे गाउँपालिका भलिबल संघबीचको उक्त खेल स्थगितपछि शनिबारमात्र हुने भलिबल संयोजक लामा अमृत गुरुङले बताए । नेपाल लोकतान्त्रिक खेलकुद संघ कास्कीले आयोजना गरेको प्रतियोगिताको फाइनल शनिबार हुनेछ । त्यसअघि दोस्रो सेमिफाइनल तथा तेस्रो स्थानको लागि खेल हुनेछ ।

प्रतियोगितामा ९ टिमले भाग लिएका हुन् । समूह ‘ए’ बाट जनकल्याण पोखरा–११ समूह विजेता र माछापुच्छ्रे गाउँपालिका भलिबल संघ समूह उपविजेता बन्दै सेमिफाइनल प्रवेश गरेका थिए । समूह ‘बि’बाट जिभिपी विजेता र माछापुच्छ«े गुराँसे भूमि घाचोक समूह उपविजेता बन्दै अन्तिम ४ मा पुगेका थिए ।

विजेताले १ लाख २० हजार र उपविजेताले ८० हजार तथा ट्रफी, मेडल र प्रमाणपत्र प्राप्त गर्ने छन् । तेस्रो हुने टिमले ४० हजार तथा सान्त्वनालाई २० हजार रुपैयाँसहित ट्रफी, मेडल र प्रमाणपत्र प्राप्त गर्ने अध्यक्ष नवीन पुनले बताए ।