शुक्लागण्डकी उद्योग वाणिज्य संघको आयोजनामा उद्योगी व्यवसायीहरुको बृहत् भेला सम्पन्न भएको छ।

उद्योगी व्यवसायीलाई शुक्लागण्डकी उद्योग वाणिज्य संघको गठन सम्बन्ध, व्यावसायिक गतिविधि तथा समसामयिक विषयको बारेमा जानकारी गराउने उद्देश्यले सो भेला बसेको हो। कार्यक्रममा प्रमुख अतिथि शुक्लागण्डकी नगरपालिका उपमेयर सविता रसाईलीले शुक्लागण्डकी उद्योग वाणिज्य संघको प्रशंसा गर्दै संस्था दर्ता भन्दा दिगो र राम्रो राख्नु प्रमुख रहेको बताइन्। उनले शुक्लागण्डकीका सबै व्यवसायीहरुलाई एकजुट हुनुपर्ने जनाइन्। यस्तै, कागले कान लग्यो भन्दैमा कान छाम्न छाडी कागको पछि नलाग्न सुझाव दिइन्।

कार्यक्रममा शुक्लागण्डकी ५ का वडा अध्यक्ष दीर्घबहादुर थापा, शुक्लागण्डकी नगरपालिकाका प्रवक्ता खिमबहादुर कुमाल, नेकपा जिल्ला सदस्य वीरेन्द्रकुमार श्रेष्ठ, भीमाद नगर उद्योग वाणिज्य संघका अध्यक्ष हस्तबहादुर खड्का, नेपाल पुस्तक तथा स्टेशनरी व्यवसायी महासंघ गण्डकी प्रदेशका अध्यक्ष दुर्गाकुमार श्रेष्ठ, समाजसेवी रामकुमारी भुषाल, व्यवसायी तथा समाजसेवी खिमानन्द गिरी, शुक्लागण्डकी उद्योग वाणिज्य संघ उपाध्यक्ष पर्ण कुमार श्रेष्ठ र सुजित हिराचन लगायतले बोलेका थिए। संघका अध्यक्ष हरि कुमार श्रेष्ठको अध्यक्षतामा भएको कार्यक्रममा स्वागत वरिष्ठ उपाध्यक्ष बिमलप्रसाद रिमाल र सञ्चालन महासचिव नारायणकुमार श्रेष्ठले गरेका थिए।