पोखरा । चलचित्र पत्रकार संघ नेपालको रजत जयन्ती अवसरमा कास्की शाखाले सोमबार शुभकामना आदानप्रदान कार्यक्रम गरेको छ । केन्द्रले भने २५ औं वार्षिकोत्सव अवसरमा काठमाडौंमा विशेष कार्यक्रमसहित पत्रकारलाई सम्मान र पुरस्कृत गरेको छ ।

७ जेठ, २०५६ मा भरत शाक्य अध्यक्षतामा जिल्ला प्रशासन कार्यालय काठमाडौंमा संस्था दर्ता भएको दिनलाई संघले स्थापना दिवस रुपमा मनाउँदै आएको छ । कास्कीमा भने २२ असार, २०६० मा शाखा गठन भएको हो । शाक्य नेतृत्वकै चलचित्र पत्रकारको टोली पोखरा आएर श्रीराम सिग्देलको अध्यक्षतामा शाखा गठन गरेको हो । त्यसबेला सिग्देल आदर्श समाज दैनिकमा कार्यरत थिए । उनीपछि क्रमश शिव शर्मा ‘चञ्चल’, रेम बिक, अरुण गिरी र प्रभू अधिकारीले नेतृत्व सम्हालेका हुन् ।

चलचित्र पत्रकार संघ नेपाल कास्की अध्यक्ष प्रभू अधिकारीको अध्यक्षतामा भएको शुभकामना आदानप्रदान कार्यक्रममा संस्थापक अध्यक्ष सिग्देलसहित निवर्तमान अध्यक्ष गिरी, पूर्व अध्यक्ष बिक, सल्लाहकार सुरेश रानाभाट, उपाध्यक्ष अर्पण तिवारी, सहसचिव शंकर तिवारी, पूर्व सहसचिव विजय नेपाल, संस्थापक सदस्य सागरराज तिमिल्सिना, संघ कार्यसमिति सदस्य सुरेश सुनार, राकेश गुरुङ, सिद्धार्थ गौतम लगायतले शुभकामना मन्तव्य व्यक्त गरे । उनीहरुले संघको समसामयिक गतिविधि, संघको विकास र चलचित्र पत्रकारको व्यावसायिकताबारे बोलेका थिए ।

संघ कास्कीले यही १९ जेठमा साधारणसभा गर्दैछ । उक्त अवसरमा ‘जितप्रसाद द्वा चलचित्र पत्रकारिता पुरस्कार–०८०’ बाट विजय नेपाललाई पुरस्कृत गरिनेछ भने चलचित्रकर्मी विनोद शेरचनलाई सम्मान गरिने छ । संघमा हाल ५५ सदस्य रहेको सचिव सन्तोष बस्यालले बताए ।