पोखरा, १६ असार । आफ्ना ग्राहकलाई उपचार खर्चमा विशेष छुट प्रदान गर्ने उदेश्यले गरिमा विकास बैंक लिमिटेड र चरक मेमोरियल अस्पताल पोखरा बीच सम्झौता पत्रमा हस्ताक्षर भएको छ ।

गरिमा विकास बैंक लिमिटेडको तर्फबाट प्रमुख कार्यकारी अधिकृत गोविन्दप्रसाद ढकाल र चरक मेमोरियल अस्पताल प्रा.लि.को तर्फबाट अस्पतालका अध्यक्ष डा. बद्री पौडेलले आइतवार सम्झौता पत्रमा हस्ताक्षरगरेका हुन् ।

सम्झौता पश्चात गरिमा विकास बैंक लिमिटेडका ग्राहकहरुले चरक मेमोरियल अस्पताल प्रा.लि.पोखरामा उपचार गराउदा सम्पूर्ण प्रकारका उपचार शुल्कमा १० प्रतिशत र औषधि खरिदमा ५ प्रतिशत छुट प्राप्त गर्नेछन ।

काठमाण्डौंको लाजिम्पाटमा केन्द्रीय कार्यालय रहेको गरिमा विकास बैंक लिमिटेडका हाल काठमाण्डौं उपत्यकाभित्र ८ सहित देशभर ७६ शाखाका साथै ३३ वटा एटीएम संचालनमा छन । बैंकले छिट्टै देशका विभिन्न १५ स्थानमा शाखा कार्यालय स्थापना गर्ने बताइएको छ ।