गैंडाकोट । गैंडाकोट नगरपालिकाले ११४ औं अन्तर्राष्ट्रिय महिला दिवसका अवसरमा महिलाको आर्थिक तथा सामाजिक सशक्तीकरण विषयक अन्तक्र्रिया गरेको छ ।

नगरप्रमुख मदनभक्त अधिकारीले आफ्नो नगरमा महिला पुरुषमा कुनै प्रकारको विभेद हुन नदिने प्रतिबद्धता व्यक्त गर्दै महिलालाई सशक्त रूपमा अघि बढ्न आह्वान गरे ।

नगरका प्रमुख प्रशासकीय अधिकृत झविन्द्र खनालले सरकार समावेशीकरणको सिद्धान्तमा अगाडि बढेको भए तापनि आशातित समानताको अवस्था नदेखिएको बताए । उनले नारीहरुको समस्यालाई समाधान गर्ने प्रविधिमैत्री आवश्यक खोजमा महिलाहरुलाई समेट्नुपर्ने आवश्यकता औंल्याए ।

सामाजिक अभियन्ता एवं महिला अधिकारकर्मी मीना खरेलले नारी दिवस केवल दिवसमा मात्र सीमित नराखी महिलाहरुलाई सक्रिय गराएर सिपमूलक र नवीनतम प्रविधिमा पहुँच पुर्‍याउनुुपर्ने धारणा राखिन् ।

नगर उपप्रमुख शान्ति कोइरालाको अध्यक्षतामा भएको कार्यक्रममा नगरकार्य समिति सदस्य तथा सामाजिक अभियन्ता शान्ति नेउपानेले स्वागत गरिन् । कार्यक्रम महिला बालबालिका तथा समाजकल्याण उपशाखा प्रमुख सीता लामिछानेले सहजीकरण गरेकी थिइन् ।