पोखरा । पोखरामा आफ्नै घरमा काम गर्ने एक युवतीले १६ तोला सुनका गरगहना चोरी गरेको घटना सार्वजनिक भएको छ । उक्त अभियोगमा पर्साको पर्सागढी नगरपालिका २, घर भइ हाल पोखरा १२ बस्ने २२ वर्षीया शिवदेवी चौधरी पक्राउ परेकी छन् । यस्तै चोरीका गहना लुकाउने मोबाइल पसलका सञ्चालकसमेत कास्की प्रहरी नियन्त्रणमा छन् ।

पोखरा १२, पशु सेवा तालिम केन्द्र कार्यालय परिसरको आवास कोठामा बस्नेले आफ्नो अन्दाजी १६ तोला बराबरका सुनका गरहगना चोरी भएको र खोजतलासी गरी पाउँ भनी कास्की प्रहरीमा गत भदौ २५ मा उजुरी दिएका थिए । उजुरी आधारमा जिल्ला प्रहरी कार्यालय र वडा प्रहरी कार्यालय रामबजारबाट खटिएको प्रहरी टोलीले उक्त आवासमा काम गर्ने शिवदेवी चौधरीलाई पक्राउ गरेको थियो । प्रारम्भिक अनुसन्धानमा उनले सुनका गरगहना चोरी गरी बुद्धचोकमा रहेको एक मोबाइल पसलमा लुकाउन दिएको बयान दिइन् । प्रहरीले पसल खानतलासी गर्दा चोरीका १६ तोला बराबरका विभिन्न सुनका गरगहना त्यहीँ भेटायो । र, पसल सञ्चालक सुजन अधिकारीसमेतलाई नियन्त्रणमा लिएको जिल्ला प्रहरी कार्यालय कास्कीका प्रहरी नायव उपरीक्षक श्रवणकुमार बिकले जनाए ।

कास्की जिल्ला अदालतबाट चोरी तथा डाँकासम्बन्धी कसूरमा ६ दिन म्याद थप गरी अनुसन्धान प्रक्रिया अघि बढाएको प्रहरीले जनाएको छ । पीडितको नाम भने प्रहरीले सार्वजनिक गरेको छैन ।