पोखरा । पोखरामा मंगलबार ७७ औं भारतीय स्वतन्त्रता दिवस मनाइएको छ । रामबजारस्थित भारतीय राजदूतावास पेन्सन वितरण क्याम्पमा कार्यक्रमको आयोजना गरी दिवस मनाइएको हो ।

पेन्सन वितरण कार्यालयका प्रमुख ले.कर्णेल प्रशान्तसिंह बघेलले भारतीय राष्ट्रिय झण्डा झण्डोत्तोलन गरेर कार्यक्रम शुभारम्भ गरे । समारोहका प्रमुख अतिथि शिक्षाविद् जर्ज जोन थिए । भूपूहरु सैनिक र भारतीय नागरिक र नेपाल भारतमैत्री विद्यालयका अभिभावकको उल्लेख्य उपस्थिति थियो ।

कार्यक्रममा नेपाल भारतमैत्री विद्यालयका विद्यार्थीद्वारा दुवै देशको राष्ट्रियगान गाउनुका साथै सांस्कृतिक, कार्यक्रम, खेलकुदका कार्यक्रम सञ्चालन गरिएको थियो । कार्यक्रममा उत्कृष्ट कर्मचारीलाई सम्मानसमेत गरिएको थियो ।

सन् १९४७ अगस्ट १५ मा भारत बेलायतबाट स्वतन्त्र भएको थियो । भारतले हरेक वर्ष अगस्ट १५ तारिखमा स्वतन्त्रता दिवस मनाउँदै आएको छ ।